စစ်ဖိနပ်အောက် ဒူးမထောက်ခဲ့တဲ့ ကျောင်းသားခေါင်းဆောင် ဆလိုင်းတင်မောင်ဦး စိတ်ဓာတ်ကို ကိုင်စွဲပြီး စစ်၃စစ်ကို အမြစ်ပြတ်တိုက်ဖျက်ကြ ဖို့ ဗမာနိုင်ငံလုံးဆိုင်ရာကျောင်းသားသမဂ္ဂများအဖွဲ့ချုပ်က တိုက်တွန်းနှိုးဆော်လိုက်ပါတယ်။
ဒီနေ့ဟာ မဆလ တစ်ပါတီ အာဏာရှင် ဦးနေဝင်းအစိုးရ ရဲ့ အင်းစိန်ထောင်မှာ မတရား ကြိုးပေးသတ်ဖြတ်ခြင်းခံရတဲ့ ကျောင်းသားခေါင်းဆောင် ချင်းတိုင်းရင်းသား ဆလိုင်းတင်မောင်ဦး ကျဆုံးခြင်း ၄၆ နှစ်ပြည့်နေ့လည်းဖြစ်ပါတယ်။
စစ်အာဏာရှင်တိုက်ဖျက်ရေး ၊ ဒီမိုကရေစီအရေးတိုက်ပွဲဝင်ရင်း ဆလိုင်းတင်မောင်ဦးဟာ ကြိုးပေးကွပ်မျက်ခံခဲ့ရတာပါ။
ဒီနေ့မှာကျရောက်တဲ့ ၄၆ နှစ်မြောက်အခမ်းအနား ကို ဗကသများအဖွဲ့ချုပ် ကသဝဏ်လွှာပေးပို့ရာမှာ ဆလိုင်းတင်မောင်ဦးဟာ လူထုတရပ်လုံးရဲ့ဘုံရန်သူကိုနောက်ဆုံးအချိန်ထိ အလျော့မပေး အညံ့မခံဘဲ အသက်စွန့်ကာ ပြတ်ပြတ်သားသားတိုက်ပွဲဝင်ခဲ့တဲ့ ကျောင်းသားအာဇာနည် ဖြစ်ပြီး အလေးအနက် ဂုဏ်ပြုမှတ်တမ်းတင်အပ်ပါတယ်လို့ပါရှိပါတယ်။
Public Service Announcement
ဒါကြောင့် ဗကသများအဖွဲ့ချုပ်အနေနဲ့ စစ်အာဏာရှင်စနစ်အမြစ်ပြတ်တိုက်ဖျက်ရေးမှာ ကျောင်းသားခေါင်းဆောင် ဆလိုင်းတင်မောင်ဦးရဲ့ ရဲဝံပြတ်သားတဲ့ တိုက်ပွဲဝင်စိတ်ဓာတ် ကို ဆက်လက်ကိုင်စွဲကာ ဘုံရန်သူကို ပြင်းပြင်းထန်ထန်တိုက်ပွဲဝင်သွားမယ်လို့ကတိသစ္စာပြုထားပါတယ်။
စစ် ၃ စစ်အမြစ်ဖြတ်ရေးဆိုတာကတော့ စစ်အစိုးရ ၊ စစ်အုပ်စု၊ စစ်ဗျူရိုကရေစီ ယန္တယားကို တိုက်ဖျက်ရေး တို့ပဲဖြစ်ပါတယ်။
