ချင်းပြည်နယ် ဖလမ်းမြို့နယ်နှင့် စစ်ကိုင်းတိုင်း ကလေးမြို့နယ်တို့တွင် ချင်းအမျိုးသားကာကွယ်ရေးတပ်ဖွဲ့ (CNDF) ပါဝင်သည့် တိုက်ပွဲများအတွင်း စစ်ကောင်စီတပ်မှ ၆၆ဦး သေဆုံးခဲ့သည်ဟု ချင်းအမျိုးသားအဖွဲ့ချုပ်(CNO/CNDF)က ထုတ်ပြန်သည်။
ဖလမ်းမြို့နယ်နှင့် ကလေးမြို့နယ်တွင် မေလနှင့်ဇွန်လအတွင်း စစ်ကောင်စီတပ်နှင့် ပစ်ခတ်တိုက်ခိုက်မှု (၁၁) ကြိမ်ဖြစ်ပွားခဲ့သည်ဟုဆိုသည်။
တိုက်ပွဲအတွင်း စစ်ကောင်စီတပ်မှ ၆၆ဦးသေဆုံးကာ ထိခိုက်ဒဏ်ရာရသူများပြားခဲ့ကြောင်းနှင့် CNDF ရဲဘော် ၃ဦးကျဆုံးကာ ၄ဦးဒဏ်ရာရခဲ့သည်ဟု ဖော်ပြသည်။ ကျဆုံး ရဲဘော် ၃ဦး အနက် ၂ဦးမှာ မိုင်းမတော်တဆမှုကြောင့်ဖြစ်သည်ဟု ဆိုသည်။
စစ်ကောင်စီတပ်သည် မေလအတွင်း၌ ဖလမ်းမြို့နယ် ရမ်ထလိုကျေးရွာမှ နေအိမ်(၁၀)လုံး၊ တလန်ဇာရ် ကျေးရွာမှ နေအိမ်(၁၇)လုံး၊ ပါရ်သဲကျေးရွာမှ နေအိမ် (၆)လုံးနှင့် ဇောင်လေးကျေးရွာမှ နေအိမ်(၅)လုံးတို့ကို မီးရှို့ဖျက်စီးခဲ့ကြောင်း CNOက ထုတ်ပြန်သည်။
Public Service Announcement
CNDFသည် ချင်းအမျိုးသားတပ်မတော်(CNA) ၊ ချင်းဒေသကာကွယ်ရေးတပ်(CDF)၊ပြည်သူ့ကာကွယ်ရေးတပ်(PDF)စသည့် ဒေသတွင်း ကာကွယ်ရေးပူးပေါင်းတပ်များနှင့်အတူ စစ်ကောင်စီတပ်ကို တိုက်ခိုက်လျက်ရှိသည်။
