စစ်ကောင်စီ၏ လူမဆန်သည့် လုပ်ရပ်ဟု ဖော်ပြ
ဦးဂျင်မီ၊ ဦးဖြိုးဇေယျာသော်၊ ဦးလှမျိုးအောင်နှင့် ဦးအောင်သူရဇော်တို့ လေးဦးအား မတရား သေဒဏ်ချမှတ်ပြီး ပြစ်ဒဏ်စီရင်ခြင်းအပေါ် အပြင်းအထန် ကန့်ကွက်ရှုတ်ချကြောင်း တိုင်းရင်းသား နိုင်ငံရေးပါတီများဖြင့် စုဖွဲ့ထားသည့် စည်းလုံးညီညွတ်သော တိုင်းရင်းသားလူမျိုးများ မဟာမိတ် (UNA)က သဘောထားထုတ်ပြန်သည်။
၎င်းတို့ လေးဦးအပေါ် သေဒဏ်ချမှတ်ခြင်းသည်ပင်လျင် တရားနည်းလမ်းကျသည့် ကိစ္စရပ်မဟုတ် သည့်အပြင် ယခုကဲ့သို့ မတရား အမိန့်ချမှတ်ထား သည့် သေဒဏ်အား ပြစ်ဒဏ်စီရင် ဆောင်ရွက်ခြင်းသည် သာ၍ နည်းလမ်းလည်းမကျ တရားဥပဒေနှင့်လည်း ကိုက်ညီမှု မရှိကြောင်း ဖော်ပြထားသည်။
ဒီမိုကရေစီတိုင်းပြည်တည်ဆောက်ရန် ရည်သန်နေသော နိုင်ငံတစ်ခုအနေဖြင့် ဤသို့သော ပြစ်ဒဏ် စီရင်ခြင်းသည် မဖြစ်သင့်သည့် ကိစ္စဖြစ်သကဲ့သို့ ယဉ်ကျေးသည့် လူ့အသိုင်းအဝိုင်း နှင့်လည်း လျော်ညီအပ်စပ်မှုမရှိကြောင်း UNAက ထုတ်ပြန်သည်။
လူ့ဂုဏ်သိက္ခာကို လေးစားသမှု မရှိသကဲ့သို့ တိုင်းပြည်၏ ဂုဏ်သိက္ခာကိုပါ အကြီးအကျယ် ညှိုးနွမ်းစေကြောင်း၊ နိုင်ငံ့အာဏာကို မတရား သိမ်းယူထား သည့် စစ်ကောင်စီ၏ တိုင်းသူ ပြည်သူများတို့ အပေါ် ပြစ်မှုကျူးလွန်သော လူမဆန်သည့် လုပ်ရပ်အဖြစ် မှတ်ကျောက်တင် ထားရမည်ဖြစ်ကြောင်း ဖော်ပြထားသည်။
Public Service Announcement
