●တော်လှန်ရေးအတွက်သာကူကြ၊ လှူကြရန် တိုက်တွန်း
၈၈ မျိုးဆက်ကျောင်းသားခေါင်းဆောင် ဦးဂျင်မီနှင့်ပတ်သက်၍ အလှူငွေကောက်ခံခြင်းမရှိကြောင်းနှင့် တော်လှန်ရေးအတွက်သာ ကူကြ၊ လှူကြရန် ဦးဂျင်မီ၏ ဇနီးဖြစ်သူ မနီလာသိန်းက အသိပေးသည်။
စစ်အုပ်စု၏ ဥပဒေမဲ့သတ်ဖြတ်ခြင်းခံရသည့် ဦးဂျင်မီအတွက် နာရေးမလုပ်၊ ဆွမ်းမသွပ်ဘဲ အမျှဝေမည်လည်း မဟုတ်ကြောင်း ထပ်မံအသိပေးထားသည်။
“ကိုဂျင်မီ ကိစ္စကို အကြောင်းပြုပြီး အလှူခံတာ လုပ်တာမျိုး၊ နာရေးအခမ်းအနား လုပ်တာမျိုးဟာ ဘယ်နိုင်ငံမှာပဲ လုပ်လုပ် ကျမနဲ့ လုံးဝ သက်ဆိုင်ခြင်းမရှိသလို ကိုဂျင်မီ့ကို အကြောင်းပြုပြီး အလှူခံတာမျိုးတွေ ရှိနေတယ်လို့ ကြားသိနေရတယ်။ ကျမအတွက်ကူငွေမလိုဘူး။ လုံးဝ …လုံးဝ…လက်မခံပါ” ဟု မနီလာသိန်းက ဆိုသည်။
ပြည်သူလူထုအနေဖြင့် အရေးတော်ပုံ အောင်ရေးအတွက် ပြိုင်တူတွန်းကြ ရုန်းကြရန် ၎င်းက ဆက်လက်တိုက်တွန်းသည်။
Public Service Announcement
“ကျမအတွက် ကူငွေမလိုဘူး လုံး၀ လုံး၀ လက်မခံပါ။ တော်လှန်ရေးအတွက်ဘဲ ကူပါ လှူပါ။ ပြိုင်တူတွန်းကြပါ၊။ ရုန်းကြပါ” ဟု မနီလာသိန်းက တိုက်တွန်းလိုက်သည်။
အကြမ်းဖက်စစ်ကောင်စီက ကိုဂျင်မီ၊ ကိုဇေယျာသော်၊ ကိုလှမျိုးအောင်နှင့် ကိုအောင်သူရဇော်တို့ လေးဦးကို ပြစ်ဒဏ်စီရင်ပြီးဖြစ်ကြောင်း ထုတ်ပြန်ခဲ့ပြီးနောက် မနီလာသိန်းက ၎င်းအနေဖြင့် ကိုဂျင်မီ၏ ရုပ်အလောင်း မတွေ့မချင်း ဆွမ်းမသွပ်၊ အမျှမဝေ၊ နာရေးမလုပ်ဟု အသိပေးခဲ့သည်။
