စစ်အုပ်စု၏ တရားမဝင်ကွပ်မျက်မှုအပါအဝင် အရေးပေါ်ရှုတ်ချပွဲတရပ်ကို ဂျပန်လွှတ်တော်အမတ်များရုံး၌ ယနေ့ပြုလုပ်ခဲ့ကြောင်း ဂျပန်နိုင်ငံဆိုင်ရာ NUG ကိုယ်စားလှယ်ရုံးက ထုတ်ပြန်သည်။
ဦးဂျင်မီ၊ ဦးဖြိုးဇေယျာသော်၊ ဦးလှမျိုးအောင်၊ ဦးအောင်သူရဇော်တို့ လေးဦးကို ကွပ်မျက်ခြင်း၊ ဝန်ကြီးချုပ်ဟောင်း ရှင်ဇိုအာဘေး၏ ဈာပနအခမ်းအနားသို့ စစ်ကောင်စီအားဖိတ်ကြားခြင်း၊ အကြမ်းဖက်စစ်သားလေးဦးကို သင်တန်းပေးခြင်းနှင့် ဂျပန်အစိုးရ၏ ODA ပေးခြင်း ကိစ္စရပ်များ အပေါ် ကန့်ကွက်ရှုတ်ချပွဲပြုလုပ်ခဲ့ခြင်းဖြစ်သည်။
အထက်ပါ အရေးပေါ်ရှုတ်ချပွဲသို့ မြန်မာနိုင်ငံအရေးထောက်ခံအားပေးသော လွှတ်တော်အမတ်များသမဂ္ဂအဖွဲ့(GIREN) နှင့် NUG ကိုယ်စားလှယ်တို့ကဦးဆောင်ကျင်းပခြင်းဖြစ်ပြီး နိုင်ငံခြားရေးဝန်ကြီးဌာနတာဝန်ခံ ၊ ဂျပန်ကာကွယ်ရေးဝန်ကြီးဌာနတာဝန်ခံ နှင့် JICA တာဝန်ခံတို့တက် ရောက်ဖြေကြားခဲ့ကြောင်း သိရသည်။
ဂျပန်နိုင်ငံခြားရေးဝန်ကြီးဌာနကလည်း မြန်မာစစ်တပ်က ဒီမိုကရေစီအရေးကြိုးပမ်းသူ ၄ ဦးကို ကွပ်မျက်ခဲ့မှုကို ပြင်းထန်စွာ ကန့်ကွက်ကြောင်း ထုတ်ပြန်ထားသည်။
Public Service Announcement
စစ်တပ်၏ လုပ်ဆောင်မှုများသည် ပဋိပက္ခကို ပိုမိုနက်ရှိုင်းစေပြီး တိုင်းပြည်ကို နိုင်ငံတကာအသိုင်းအဝန်းမှ ပိုမိုဖယ်ကြဉ်စေမည်ဖြစ်ကြောင်း ဂျပန်နိုင်ငံခြားရေးဝန်ကြီးဌာနက သတိပေးထား သည်။
