စစ်ကောင်စီ၏ကွပ်မျက်မှု ရန်စခြင်းဖြစ်ပြီး ထပ်တိုးအရေးယူဖိအားပေးရန် နိုင်ငံတကာကို အီးယူအကြီးအကဲတိုက်တွန်း

ဒီမိုကရေစီတက်ကြွလှုပ်ရှားသူလေးဦးကို ကွပ်မျက်ခြင်းသည် စစ်ကောင်စီ၏ ရန်စမှုဖြစ်ပြီး အာဆီယံနှင့် နိုင်ငံတကာအသိုင်းအဝန်းက ပိုမိုဖိအားပေးအရေးယူရန် ဥရောပသမဂ္ဂအကြီးအကဲ Josep Borrel က ပြောသည်။

ကမ္ဘောဒီးယား၌ ကျင်းပခဲ့သည့် အာဆီယံနိုင်ငံခြားရေးဝန်ကြီးများအစည်းအဝေး သို့ တက်ရောက် အပြီးတွင် မြန်မာ့အကျပ်အတည်းနှင့်ပတ်သက်၍ ခိုင်မာရဲရင့် သောလုပ်ဆောင်မှုများဖြင့် ဖြေရှင်း ဆောင်ရွက်ရန် အထက်ပါအီးယူအကြီးအကဲ က တိုက်တွန်းသည်။

မြန်မာ့ဒီမိုကရေစီတက်ကြွလှုပ်ရှားသူများဖြစ်သည့် ၈၈ မျိုးဆက် ကျောင်းသားခေါင်းဆောင် ဦးဂျင်မီ၊ NLD အမတ်ဟောင်း ဦးဖြိုးဇေယျာသော်၊ ဦးလှမျိုးအောင်၊ ဦးအောင်သူရဇော်တို့လေးဦး ကို စစ်ကောင်စီက ဥပဒေမဲ့သတ်ဖြတ်မှုအပေါ် “ဒါက ရှင်းရှင်းလင်းလင်းရန်စလိုက်တာပါပဲ”ဟု Josep Borrel က ဆိုသည်။

အာဆီယံနိုင်ငံခြားရေးဝန်ကြီးများကလည်း စစ်ကောင်စီ၏ ဘုံဆုံးဖြတ်ချက် ၅ ရပ်မလိုက်နာမှုနှင့် သေဒဏ်ကွပ်မျက်မှုများအပေါ် ‘လွန်စွာစိတ်ပျက်ကြောင်း’ ပြင်းထန်စွာ ပူးတွဲထုတ်ပြန်ခဲ့သည်။

Public Service Announcement

အထက်ပါ အီးယူအကြီးအကဲက နိုင်ငံတကာအသိုင်းအဝန်းအနေဖြင့် စစ်ကောင်စီအပေါ် စီးပွားရေး၊ နိုင်ငံရေး ဘက်ပေါင်းစုံ ပိုမိုဖိအားပေးမှု ဆက်လက်လုပ်ဆောင်ရမည်ဟု တိုက်တွန်းသည်။

“ကျွန်တော်တို့ ဖိအားဆက်ပေးနေရပါမယ်။ စစ်ကောင်စီအနေနဲ့ အတိုက်အခံနိုင်ငံရေးအင်အားစု တွေနဲ့ ညှိနှိုင်းဖို့ စားပွဲဝိုင်းထိုင်ရေး ကြိုးပမ်းနေ တဲ့ အာဆီယံအထူးကိုယ်စားလှယ်ကိုလည်း အား ပေးထောက်ခံပါတယ်”ဟု Borrell က ပြောသည်။

အာဆီယံသည် ယခုကျင်းပပြီးစီးသော အစည်းအဝေးတွင်လည်း အကြမ်းဖက်စစ်ကောင်စီကို တက်ရောက်ခွင့်မပေးဘဲ ဖယ်ချန်ထားသည်။

ကိုးကား – laprensalatina