ကရင်တော်လှန်ရေးအင်းအားစုတွေနဲ့ လက်တွဲဆောင်ရွက်ပြီး ကရင်လူမျိုးနဲ့ တိုင်းရင်းသားပြည်သူလူထုအားလုံးလိုလားတဲ့ ဖက်ဒရယ်ဒီမိုကရေစီပြည်ထောင်စုတည်ဆောက်ရေးအတွက် ကြိုးပမ်းဆောင်ရွက်သွားမယ်လို့ ကရင်အာဇာနည်နေ့အခမ်းအနားကို အမျိုးသားညီညွတ်ရေးအစိုးရ(NUG)က သဝဏ်လွှာပေးပို့လိုက်ပါတယ်။
ဒီကနေ့ ၂၀၂၂ ခုနှစ်၊ ဩဂုတ်(၁၂)ရက်နေ့ဟာ ကရင်အမျိုးသားခေါင်းဆောင်စောဘဦးကြီးနဲ့တကွ ကရင်ခေါင်းဆောင်တွေကျဆုံးခဲ့တဲ့ (၇၂)နှစ်မြောက် ကရင်အာဇာနည်နေ့ဖြစ်ပြီး ဒီနေ့ရက်အချိန်အခါဟာ ကရင်လူမျိုးတို့ရဲ့သမိုင်းနဲ့ တော်လှန်ရေးသမိုင်းမှာ မေ့ပျောက်လို့မရတဲ့ အောက်မေ့ဖွယ်နေ့ရက်ဖြစ်တယ်လို့ သဝဏ်လွှာမှာဖော်ပြထားပါတယ်။
ဥက္ကဌစောဘဦးကြီးက ချမှတ်ခဲ့တဲ့ လမ်းညွှန်မူ(၄)ချက်ကို မဆုတ်မနစ်ကိုင်စွဲပြီး ကရင်အမျိုးသားတော်လှန်ရေးအတွက်သာမက လွန်လေပြီးသော နှစ်ပေါင်း(၇၀)ကျော်ကစကာ မျက်မှောက်ခေတ်နွေဦးတော်လှန်ရေးအထိ မြန်မာနိုင်ငံမှာ စစ်အာဏာရှင်စနစ်ချုပ်ငြိမ်းရေးနဲ့ ဖက်ဒရယ်ဒီမိုကရေစီပြည်ထောင်စုတည်ဆောက်ရေးအတွက် စွန့်လွှတ်အနစ်နာခံပြီး ဦးဆောင်တိုက်ပွဲဝင်လျက်ရှိတဲ့ KNU/KNLA အတွက် များစွာလေးစာဂုဏ်ယူတယ်လို့ NUG က ဆိုပါတယ်။
ဒါ့အပြင် အမျိုးသားညီညွတ်ရေးအစိုးရဟာ စစ်အာဏာရှင်စနစ်ကိုချုပ်ငြိမ်းပြီး ခေတ်အဆက်ဆက် တိုင်းရင်းသားပြည်သူလူထုတစ်ရပ်လုံးက လိုလားတောင့်တခဲ့တဲ့ ဒီမိုကရေစီရေး၊ တန်းတူရေးနဲ့ ကိုယ်ပိုင်ပြဌာန်းခွင့် အခွင့်အရေးတွေကို အပြည့်အ၀အာမခံချက်ရှိတဲ့ ဖက်ဒရယ်ဒီမိုကရေစီပြည်ထောင်စုတည်ဆောက်ရေးအတွက် သန္နိဌာန်ချထားတဲ့ အစိုးရဖြစ်တယ်လို့လည်း သဝဏ်လွှာမှာပါရှိပါတယ်။
Public Service Announcement
ဒီကနေ့ကျရောက်တဲ့ (၇၂)နှစ်မြောက် ကရင်အာဇာနည်နေ့မှာ အမျိုးသားညီညွတ်ရေးအစိုးရအနေနဲ့ ကရင်တစ်မျိုးသားလုံးနဲ့အတူ ကရင်အာဇာနည်အပေါင်းကို အောက်မေ့အမှတ်ရတယ်လို့ NUG ရဲ့ ကရင်အာဇာနည်နေ့အခမ်းအနားကို ပေးပို့တဲ့သဝဏ်လွှာမှာ ဖော်ပြထားတာဖြစ်ပါတယ်။
