ပြည်သူလူထု၏ ပိုင်ဆိုင်မှုများ တန်ဖိုးထက်ဝက် လျော့ကျသွားစေခြင်း၏ အဓိက တရားခံစစ်အုပ်စုကို အမြစ်ဖြတ်ရန် အချိန်ရောက်ပြီဟု NUG ပြည်ထောင်စုဝန်ကြီးချုပ် မန်းဝင်းခိုင်သန်းက ပြောသည်။
ယနေ့ကျင်းပသော ပြည်ထောင်စုအစိုးရအဖွဲ့အစည်း၌ ဝန်ကြီးချုပ်က ပြည်သူတွင် ပြည်သူသာရှိ၍ အတူတူရုန်းကန်ကြမှသာ ယခုထက်ဆိုးရွားသည့်အခြေအနေမကြုံတွေ့မည်ဖြစ်ကြောင်း ပြောသည်။
“ကျနော်တို့အားလုံးကြုံတွေ့ဖြတ်သန်းခဲ့ကြရတဲ့ ၁၉၆၀-၁၉၇၀ ခုနှစ်တွေဆီကို ကျနော်တို့နောင်မျိုးဆက်တွေကို ပြန်လည်ခေါ်ဆောင်သွားဖို့ဆို တာလုံး ဝမဖြစ်သင့်တဲ့ကိစ္စတခုဖြစ်ပါတယ်။ ကျနော်တို့လည်းတပါတီအာဏာရှင်စနစ်အောက်မှာ နှစ်ပေါင်းများ စွာ မျက်စိပိတ်နားပိတ်နေခဲ့ကြရပြီး ဒီမိုကရေစီအသီးအပွင့်လေးမြင်တွေ့ရဖို့ နှစ်ပေါင်းများစွာ အသက် သွေးချွေးပေး ဆပ်ပြီး ကြိုးစားခဲ့ကြတာမို့ ဒီခရီးကရှည်ပေမယ့် ဆက်လက်ကြိုးစား လျှောက်လှမ်းရင်း အောင် ပွဲဆီသွားကြဖို့လိုအပ်ပါတယ်။ ဒါဟာကျနော်တို့အားလုံးအတွက် အနိုင်တိုက်ရမယ့်နောက်ဆုံး ပွဲလည်းဖြစ်ပါတယ်” ဟု ဝန်ကြီးချုပ်က ပြောသည်။
ဆက်လက်၍ “ကျနော်တို့တက်ညီလက် ညီဆက်ကြိုးစားကြမယ် ဆိုရင် အောင်ပွဲကမဝေးတော့ ပါဘူး။ ပြည်သူတွေတက်ညီလက်ညီဆက် လက်တိုက်ပွဲဝင်နိုင်ဖို့ ဦးဆောင်မှုပေးရမှာကတော့ ကျနော်တို့ တော်လှန်ရေးအင်အားစုတွေဖြစ်ပါတယ်” ဟု ၎င်းက ဆိုသည်။
Public Service Announcement
သို့သော် ယနေ့အချိန်အခါမျိုးတွင် NUG အနေဖြင့် ဦးဆောင်မှုကောင်းကောင်းဖြင့် အချိတ်အဆက်မိမိ စီမံနိုင်ရန် လွန်စွာအရေးကြီးပြီး ဝန်ကြီးဌာနတခုချင်းစီ အလိုက်တော်လှန်ရေးကိုရှေးရှုတဲ့လုပ်ငန်းစဉ်များ အကောင်အထည်ဖော်ရန် လိုအပ်ကြောင်း ပြည်ထောင်စုဝန်ကြီးချုပ်က တိုက်တွန်းသည်။
ဝန်ကြီးဌာနများ ပေါင်းစပ်လုပ်ဆောင်ရမည့် အလုပ်များကိုလည်းနှောင့်နှေးမှုမရှိဘဲ ပူးပေါင်းဆောင်ရွက်နိုင်ရန် လိုအပ်ကြောင်း တိုက်တွန်းသည်။
ထို့အပြင် အမျိုးသားညီညွတ်ရေးအစိုးရအဖွဲ့၏ ကော်မတီများ၊ အဖွဲ့များ၏ လုပ်ဆောင်ချက်များကို အစိုးရအဖွဲ့ဝင်များအကြား အချင်းချင်း အဆက်အသွယ် မပြတ်ဘဲ ချိတ်ဆက်နိုင်ရေးနှင့် အကြမ်းဖက်စစ်တပ်ကို အမြစ်ပြတ်ချေမှုန်းနိုင်ရေးအတွက် အစိုးရအဖွဲ့ ဝင်အားလုံး အားထည့်၍ ဆက်လက်ကြိုးပမ်းဆောင်ရွက်ရေး ဝန်ကြီးချုပ်က တိုက်တွန်းသည်။
