စစ်ကောင်စီတပ်သေဆုံးထိခိုက်ရှိ
စစ်ကောင်စီတပ်သေဆုံးထိခိုက်ရှိစစ်ကိုင်းတိုင်း ထီးချိုင့်မြို့နယ်ဘက်မှ အင်းတော် ဘက်သို့ တက်လာသည့် စစ်ကောင်စီတပ်ကို ကချင်လွတ်လပ်ရေးတပ်မတော်(KIA)နှင့် ဒေသခံ ပြည်သူ့ကာကွယ်ရေးတပ်(PDF) ပူးပေါင်း၍ ယမန်နေ့က တိုက်ခိုက်ခဲ့ရာ စစ်ကောင်စီတပ်ဖွဲ့ဝင်များ သေဆုံးထိခိုက်မှုရှိခဲ့ကြောင်း Indaw Revolution က ဖော်ပြသည်။
ယမန်နေ့ (ဩဂုတ် ၁၉ရက်)နံနက်ပိုင်းတွင် အင်အား ၆၀ ကျော်ပါ စစ်ကောင်စီတပ်ကို ထီးချိုင့်နှင့် အင်းတော်ကြား ဆင်မတောင်ဘက်တွင် မိုင်း သုံးလုံး ဆွဲ တိုက်ခိုက်ပြီး ဝင်ရောက်ပစ်ခတ်ခဲ့သည်ဟု ဆိုသည်။
မိုင်းဆွဲတိုက်ခိုက်မှုကြောင့် စစ်ကောင်စီတပ် အထိအခိုက် အကျအဆုံး ရှိပြီး ပစ်ခတ်မှုကြောင့် စစ်ကောင်စီတပ်မှ နှစ်ဦးသေဆုံးခဲ့သည်ဟု ဖော်ပြသည်။
အဆိုပါ တိုက်ခိုက်မှုအတွင်း ပူးပေါင်းတပ်ဖွဲ့ဘက်မှ ထိခိုက်ကျဆုံးမရှိဘဲ ပြန်လည် ဆုတ်ခွာနိုင်ခဲ့ ကြောင်း အသိပေးထားသည်။
Public Service Announcement
ယနေ့ ညပိုင်းတွင်လည်း စစ်ကောင်စီတပ်များသည် အင်းတော်မြို့နယ် နန့်သာရွာမှ တောထဲဘက်သို့ လက်နက်ကြီးများ ရမ်းသမ်းပစ်ခတ်နေကြောင်း ထုတ်ပြန်ထားသည်။
လက်တလောတွင် ထီးချိုင့်၊ အင်းတော်၊ ဗန်းမောက် စသည့် ဒေသများ၌ စစ်ကောင်စီတပ်များ ဝင်ရောက်လှုပ်ရှားနေ၍ မကြာခဏ တိုက်ပွဲဖြစ်ပွားလျက်ရှိသည်။
