စစ်ကိုင်းတိုင်း၊ ဆားလင်းကြီးမြို့နယ် ဝမ်ပေါင်ကုမ္ပဏီဝင်းမှ အနောက်မြောက်တိုင်းစစ်ဌာနချုပ်သို့ ကြေးနီများသယ်ဆောင်ရန်လာသည့် အကြမ်းဖက်စစ်ကောင်စီယာဥ်တန်းအား မိုင်းဆွဲတိုက်ခိုက်ခဲ့ရာ ထိခိုက်မှုများရှိကြောင်း ချင်းတွင်းရိုးမ မဟာမိတ်တပ်ပေါင်းစုက သတင်းထုတ်ပြန်သည်။
ယနေ့ (သြဂုတ်၂၅ ရက်)တွင် စစ်ကောင်စီတပ်သည် ဆားလင်းကြီးမြို့နယ် ရွှေတောင်ဦးကုန်းမှ ဝမ်ပေါင်ကုမ္ပဏီကြေးနီသတ္တုတွင်းစီမံကိန်းဝင်းအထိ စစ်ကောင်စီတပ်အင်အား အများအပြားချကာ လမ်းဘေးဝဲယာပစ်ခတ်ခဲ့ပြီး ကင်းများချထားခဲ့သည်။
ထို့နောက် ဝမ်ပေါင်ကုမ္မဏီမှကြေးနီများအား ခေါင်းဖြူတွဲကားကြီး ခြောက်စီးဖြင့် မုံရွာ အနောက်မြောက်တိုင်းစစ်ဌာနချုပ်သို့ သယ်ယူသွားကြောင်း ချင်းတွင်းရိုးမ မဟာမိတ်တပ်ပေါင်းစုက အသိပေးသည်။
ထို့နောက် ကြေးနီများသယ်ရန်လာသော ရှေ့ပြေးကားအသေးတစ်စီးနှင့် ဖောကား၂စီးတို့အား ပုသိမ် – မုံရွာလမ်း (၁၆)ကုတင်ဆေးရုံအနီး မိုင်းဆွဲတိုက်ခိုက်ခဲ့ကြောင်း ချင်းတွင်းရိုးမ မဟာမိတ်တပ်ပေါင်းစု၏ ထုတ်ပြန်ချက်တွင် ဖော်ပြသည်။
Public Service Announcement
“ကားအသေးတစ်စီး မိုးပေါ်သို့ ပျံတက်သွားကာသုံးယောက် ငရဲပို့နိုင်လိုက်ပါတယ်။”ဟု ချင်းတွင်းရိုးမ မဟာမိတ်တပ်ပေါင်းစုက ဆိုသည်။
ကင်းလုံခြုံရေးယူထားသော စစ်ကောင်စီတပ်များသည် လက်နက်ကြီးများဖြင့် ရမ်းသမ်းပစ်ခတ်ခဲ့ရာ ကံကုန်းရွာလူနေအိမ်ပေါ်ကျ၍ လူနေအိမ် သုံးလုံး မီးလောင်ပြာကျသွားကြောင်း သိရသည်။
စစ်ကောင်စီတပ်သည် ကံကုန်းရွာစပယ်ရုံဘုန်းကြီးကျောင်းတွင် အခြေပြုပြီး သြဂုတ် ၂၆ရက်နေ့၌ ချင်းတွင်းမြစ်ဆိပ်ကမ်းမှ ဖောက်ခွဲရေးယမ်းများ ဝမ်ပေါင်သို့လာပို့မည့် သင်္ဘောများကို ဆက်လက်လုံခြုံရေးယူမည်ဟု သိရကြောင်း ချင်းတွင်းရိုးမ မဟာမိတ်တပ်ပေါင်းစုက အသိပေးသည်။
ဖြစ်စဥ်နှင့်ပတ်သက်ပြီး ချင်းတွင်းရိုးမ မဟာမိတ်တပ်ပေါင်းစုထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။ ထိခိုက်သေဆုံးမှုအခြေအနေနှင့်ပတ်သက်၍ People’s Springက ထပ်မံအတည်ပြုနိုင်ခြင်းမရှိသေးပေ။
ဝမ်ပေါင်ကုမ္မဏီမှ ကြေးများသယ်ယူမည့် ယာဥ်တန်းဖြတ်မည့် ပုသိမ်-မုံရွာ လမ်းပိုင်းတလျှောက် စစ်ကောင်စီကလုံခြုံရေး အပြည့်ယူထား၍ ခရီးသွားပြည်သူများ သတိပြုသွားလာကြရန် ပြည်သူ့ကာကွယ်ရေးအဖွဲ့များက ယနေ့တွင် သတိပေးထားခဲ့သည်။
“တစ်လမ်းလုံး စခတွေ ပွိုင့်ချထားတယ်။ ဒေသခံတွေအတွက် အထူးဂရုစိုက်ပေးကြပါ”ဟု ဒေသတွင်းအခြေစိုက် လူငယ်ပြည်သူ့ကာကွယ်ရေးအဖွဲ့ဖြစ်သော သူ့ကျွန်မခံမြေဆိုးတစ်သိုက်မှ ပြည်သူ့ရဲဘော်တစ်ဦးက ပြောသည်။
