မန္တလေး ဆေးတက္ကသိုလ်ရဲ့ ထူးချွန်ကျောင်းသားအဖြစ် အသိအမှတ်ပြု ခံထားရသူ ဒေါက်တာကျော်ကျော်သက်ကို ဖမ်းဆီးပြီး တစ်နှစ်ကျော်အကြာမှာ စစ်အုပ်စုက အကြမ်းဖက်ပုဒ်မနဲ့ ထောင်ဒဏ် ၇ နှစ် မနေ့က ချလိုက်ပါတယ်။
ဒေါက်တာကျော်ကျော်သက်ကို ပြီးခဲ့တဲ့ နှစ် ဇူလိုင်လအတွင်း စစ်ကောင်စီတပ်က ဖမ်းဆီးခဲ့တာပါ။
ဖမ်းဆီးပြီးနောက် အမှုဆင်ရာမှာ NUG နဲ့ပတ်သက်တာ ၊ အွန်လိုင်းကနေ ဆေးပညာ သင်ကြားတာတွေကို အကြောင်းပြကာ ဆူပူအောင်လှုံဆော်မှုပုဒ်မ ၅၀၅ (က) ၊ အကြမ်းဖက်ပုဒ်မ ၅၂(က)နဲ့ တရားစွဲခဲ့တာဖြစ်ပါတယ်။
နေအိမ်ကိုဝင်ရောက်ပြီး ဖမ်းဆီးချိန်ကလည်း စစ်ကောင်စီတပ်ဟာ သေနတ်ပစ်ဖောက်ပြီး ရိုက်နှက်ဖမ်းဆီးတာမျိုးလုပ်ခဲ့တာပါ။
Public Service Announcement
“သူက ကျွန်တော့ရဲ့ စီနီယာဗျ ၊ ကျောင်းမှာ အထူးချွန်ဆုံးကျောင်းသားဆိုပြီး လေးစားအားကျရတဲ့သူပါ၊မနက်စောမှာ သူ့သတင်းတွေ့လိုက်ရတော့ အတော်လေးစိတ်မကောင်းဖြစ်မိတယ်ဗျာ”လို့ စစ်ကောင်စီက ဒေါက်တာကျော်ကျော်သက်ကိုထောင်ချလိုက်တဲ့သတင်းနဲ့ပတ်သက်ပြီး CDMပြုလုပ်ထားတဲ့ ဆရာဝန်တစ်ဦးကပြောပါတယ်။
စွဲဆိုထားတဲ့ ပုဒ်မ ၂ ခုထဲက ပုဒ်မ ၅၀၅ (က) နဲ့ ထောင်ဒဏ် ၃ နှစ်ကို ပြီးခဲ့တဲ့မေလအတွင်းက စစ်အုပ်စုက ချထားပြီးဖြစ်ပါတယ်။
ဒါကြောင့် ဒေါက်တာကျော်ကျော်သက်ကို စစ်အုပ်စုဟာ ထောင်ဒဏ် စုစုပေါင်း ၁၀ နှစ်ထိ ချထားတာဖြစ်ပါတယ်။
အသက် ၂၈နှစ်အရွယ်ရှိ ဒေါက်တာကျော်ကျော်သက်ဟာ မန္တလေးဆေးတက္ကသိုလ်ကနေ ဆရာဝန်ဘွဲ့ရရှိပြီး စစ်တပ်ကမဖမ်းစီးခင်အချိန်ထိ ပရဟိတဆေးခန်းများနဲ့ လူမှုရေးလုပ်ငန်းတွေမှာ လုပ်ကိုင်နေသူလည်းဖြစ်ပါတယ်။
စစ်အုပ်စုဟာ CDMလှုပ်ရှားမှုအားကောင်းခဲ့တဲ့ ကျန်းမာရေးဝန်ထမ်းတွေကို အငြိုးထားဖမ်းဆီးခဲ့ပြီး မတရားပုဒ်တွေနဲ့ တရားစွဲဆိုထောင်ချနေတာဖြစ်ပါတယ်။
