ရှမ်းမြောက် သိန္နီမြို့အနီးတွင် မြောက်ပိုင်းမဟာမိတ်အဖွဲ့နှင့် စစ်ကောင်စီတပ် တိုက်ပွဲဖြစ်နေ

ရှမ်းပြည်နယ်မြောက်ပိုင်း၊ သိန္နီမြို့အနီး မြောက်ပိုင်းမဟာမိတ်အဖွဲ့နှင့် စစ်ကောင်စီတပ် ယနေ့ နေ့လည်ပိုင်းတွင် တိုက်ပွဲပြင်းထန်နေသည်ဟု ဒေသခံများက ပြောသည်။

သိန္နီမြို့မှ ကွတ်ခိုင်မြို့ဘက်သို့ သွားသည့် ပြည်ထောင်စုလမ်းမကြီးပတ်ဝန်းကျင်တွင် တိုက်ပွဲဖြစ်နေခြင်း​​ ဖြစ်သည်။

“တိုက်ပွဲကပြင်းထန်တယ်။ ကားတွေ ပိတ်ဆို့သွားတယ်။ဒီရက်ထဲ တိုက်ပွဲတွေဆက်လာနိုင်တာမို့ သတိဝိရိယနဲ့ သွားလာကြဖို့ လိုတယ်”ဟု သိန္နီမြို့ခံတစ်ဦးက ပြောသည်။

တိုက်ပွဲသည် ယနေ့(စက်တင်ဘာလ ၄ရက်) နေ့လယ် ၁နာရီခန့်တွင် စတင်ဖြစ်ပွားပြီး ညနေ ၃နာရီခန့်တွင် ရပ်တန့်နေသည်။

Public Service Announcement

” သေနတ်သံတွေ ရပ်သွားလို့ ကားတွေ ​ဖြတ်နေကြတယ်။ အဆခြအနေကတော့ မှန်းဆဖို့ခက်ပါတယ်”ဟု ခရီးသည်တင်ယာဥ်မောင်းတစ်ဦးက ပြောသည်။

ကွတ်ခိုင်မြို့တွင် ပြီးခဲ့သည့်ဇွန်လအတွင်းက မြောက်ပိုင်းမဟာမိတ်အဖွဲ့နှင့် စစ်ကောင်စီတပ်တိုက်ပွဲ​ဖြစ်ပွားစဥ် စစ်ကောင်စီဘက်က ပစ်ခတ်သော လက်နက်ကြီးကျည်သည် စစ်ဘေးရှောင်စခန်းအတွင်းကျရောက်ပေါက်ကွဲခဲ့၍ အရပ်သားသုံးဦး သေဆုံးခဲ့သည်။

စစ်ကောင်စီတပ်သည် အရပ်သားပစ်မှတ်များကိုပါ ဦးတည်တိုက်ခိုက်လာနိုင်၍ သတိပြုနေထိုင်ကြရန် ဒေသတွင်း တော်လှန်ရေးအင်အားစုများက သတိပေးသည်။

မြောက်ပိုင်းမဟာမိတ်အဖွဲ့တွင် ကချင်လွတ်မြောက်ရေးတပ်မတော်(KIA)၊ တအာင်းလွတ်မြောက်ရေးတပ်မတော်(TNLA)၊ ရက္ခိုင့်တပ်တော်(AA)နှင့် ကိုးကန့်လွတ်မြောက်ရေးတပ်မတော်(MNDAA)တို့ ပါဝင်သည်။ KIA အခြေစိုက်သည့် ကချင်ပြည်နယ်နှင့် AA အခြေစိုက်သော ရခိုင်ပြည်နယ်တွင်လည်း စစ်ကောင်စီနှင့်တိုက်ပွဲများ ဖြစ်ပွားနေသည်။