မြန်မာနိုင်ငံ၏ ငွေကြေးဖောင်းပွနှုန်းသည်၁၂၇ ရာခိုင်နှုန်းရှိပြီး ကမ္ဘာတွင်ငွေကြေးအဖောင်းပွဆုံးနိုင်ငံများ စာရင်း၌အဆင့် ၅ တွင်ရပ်တည်နေကြောင်း အမေရိကန်John’s Hopkins တက္ကသိုလ်၊ စီးပွားရေးပညာရှင်Steve Hankeက ပြောသည်။
အဆိုပါငွေကြေးဖောင်းပွနှုန်းများသည် ၂၀၂၂ စက်တင်ဘာ ၈ ရက်က တွက်ချက်ခဲ့ခြင်းဖြစ်ကာ ထိုတွက်ချက်မှုများအရ ဇင်ဘာဘွေနိုင်ငံက ကမ္ဘာပေါ်တွင် ငွေကြေးဖောင်းပွမှုအများဆုံးနိုင်ငံ့ဖြစ်ပြီး မြန်မာနိုင်ငံအထက်တွင် ကျူးဘား၊ လက်ဘနွန်နှင့် တူရကီနိုင်ငံတို့သာရှိပြီး မြန်မာက ငွေကြေးဖောင်းပွမှု ၁၂၇ ရာခိုင်နှုန်းဖြင့် အဆင့် ၅ ၌ရပ်တည်နေခြင်းဖြစ်သည်။
မြန်မာနိုင်ငံသည် ငွေကြေးဖောင်းပွနှုန်းသည် ၂၀၂၂ဧပြီတွင် ၁၈ ရာခိုင်နှုန်းရှိခဲ့ပြီး စက်တင်ဘာ ၈ ရက်တွင် ၁၂၇ ရာခိုင်နှုန်းရှိလာခြင်းဖြစ်သည်ဟု အဆိုပါစီးပွားရေးပညာရှင်ကတွက်ချက်ဖော်ပြထားသည်။
မြန်မာနိုင်ငံ၏ ငွေကြေးဖောင်းပွနှုန်းများသည် လက်ရှိပြင်ပပေါက်ဈေးများကို အခြေခံတွက်ချက်ထားခြင်း ဖြစ်သည်ဟုလည်း Steve Hanke ကဆိုသည်။
Public Service Announcement
စစ်ကောင်စီထိန်းချုပ်ထားသည့် ဗဟိုဘဏ်က တစ်ဒေါ်လာကို ကျပ် ၂၁၀၀သတ်မှတ်ထားသော်လည်း ပြင်ပပေါက်ဈေးတွင်ယခုအခါ တစ်ဒေါ်လာကို ကျပ် ၃၄၀၀ မှ ၃၅၀၀ကြားရှိနေသည်။ အလားတူထိုင်းဘတ်၊တရုတ်ယွမ်၊စင်ကာပူဒေါ်လာ၊အန္ဒိယရူပီ စသောနိုင်ငံခြားငွေများနှင့်လဲနှုန်းတွင်လည်းကျပ်ငွေတန်ဖိုးကျဆင်းနေသည်။ငွေလဲနှုန်းတန်ဖိုးကျပြီးစက်သုံးဆီဈေးနှုန်းများလည်းတက်လာသဖြင့် ပြည်တွင်၌ကျပ်ငွေဖောင်းပွကာ အထွေထွေကုန်ဈေးနှုန်းများကြီးမြင့်ကာပြည်သူအများစုအခက်တွေ့နေကြသည်။
စစ်တပ်အာဏာမသိမ်းခင်က တစ်ဒေါ်လာကို ကျပ် ၁၃၃၇ ရှိပြီး အာဏာသိမ်းပြီးတနှစ်ကျော်ကာလအတွင်း ဒေါ်လာဈေးဖြင့်နှုန်းယှဉ်ပါက ကျပ်ငွေတန်ဖိုးသည် ၁၆၀ရာခိုင်နှုန်းကျော်ကျဆင်းခဲ့ခြင်းဖြစ်သည်။
