စစ်ကိုင်းတိုင်း၊ ဘုတလင်မြို့နယ် ပဲပြစ်တောကျေးရွာကို စစ်ကောင်စီတပ်က ဝင်ရောက်ပစ်ခတ်ခဲ့၍ PDF ရဲဘော်များအပါအဝင် ခြောက်ဦးကျဆုံးခဲ့ကြောင်း ဒေသတွင်း သတင်းရင်းမြစ်များက ပြောသည်။
ယနေ့ (စက်တင်ဘာ၁၃ ရက်) နံနက် ၅နာရီခန့်က ဘုတလင်မြို့နယ်၊ ပဲပြစ်တောကျေးရွာကိုမီးရှို့ဖျက်ဆီးခြင်းများ ပြုလုပ်ခဲ့ကြောင်း၊ ထိုသို့ ဖျက်ဆီးသွားပြီးနောက် PDFအဖွဲ့ဝင်များက လာရောက်မီးငြှိမ်းသတ်ခဲ့ရာ စစ်ကောင်စီ၏ ကင်းပုန်းများနှင့်တိုးပြီး ပစ်ခတ်သတ်ဖြတ်ခံခဲ့ရခြင်းဖြစ် ကြောင်း ဒေသခံများက ပြောသည်။
ကျဆုံးခဲ့သည့် ခြောက်ဦးတွင် PDF ရဲဘော် ငါးဦးနှင့် CDM စစ်သားတစ်ဦးပါဝင်သည်ဟုဆိုပြီး ထပ်မံအတည်ပြုနိုင်ခြင်းမရှိသေးပေ။
အဆိုပါ ပဲပြစ်တောကျေးရွာတွင် စက်တင်ဘာ ၁၀ရက်က CDM ပြုလုပ်လာသော ရဲဘော် နှစ်ဦးအား ကျပ်သိန်း၅၀စီ အခမ်းအနားဖြင့် ဆုချီးမြှင့်ခဲ့ကြောင်း၊ အဆိုပါ သတင်းကို စစ်ကောင်စီက သတင်းရရှိသွား၍ လာရောက်ပစ်ခတ်ခဲ့ခြင်းဖြစ်ကြောင်း ဒေသခံများက ပြောသည်။
Public Service Announcement
ဘုတလင်နယ်အခြေစိုက် GM LPDFကမူ ယနေ့ဖြစ်စဥ်၌ ကျဆုံးခဲ့သော ၎င်းတိို့အဖွဲ့က ရဲဘော် အောင်နိုင်ဦးအတွက် အမိန့်ပြန်တမ်းထုတ်ပြန်ခဲ့သည်။
ဖြစ်စဥ်နှင့်ပတ်သက်၍ ဒေသတွင်းPDFအဖွဲ့များထံ ဆက်သွယ်မေးမြန်းရန်ကြိုးစားသော်လည်း ဆက်သွယ်၍ မရသေးပေ။
