ဒီးမော့ဆို့မြို့နယ် ကုန်းသာကျေးရွာတိုက်ပွဲတွင် စစ်ကောင်စီတပ်မှ ၁၅ ဦးသေဆုံးကြောင်း ကရင်နီတော်လှန်ရေးတပ်ပေါင်းစု-KRUက ယနေ့(စက်တင်ဘာ ၂၇ ရက်)တွင် ထုတ်ပြန်သည်။
တိုက်ပွဲဖြစ်စဥ်အရ ယမန်နေ့ (စက်တင်ဘာ ၂၆ရက်) က စစ်ကောင်စီ တပ်စွဲထားသော ကုန်းသာ ကျေးရွားအတွင်းသို့ ညနေ ၄ နာရီခွဲခန့်ကစ၍ ညနေ ၆ နာရီအထိ KRUနှင့် မဟာမိတ်တပ် DMO PDFတပ်ရင်း (A)တို့ပူးပေါင်း တိုက်ခိုက်ခဲ့သည်ဟု ဆိုသည်။
တိုက်ပွဲအတွင်း စစ်ကောင်စီတပ်မှ ၁၅ဦးသေဆုံးကာ KRU မှ ရဲဘော်တစ်ဦး ပြင်းထန်ဒဏ်ရာရရှိခဲ့သည်။
“ကုန်းသာမှာ စကစ အနေနဲ့ အင်အား ၅၀လောက်နဲ့ တပ်စွဲထားတာ။ဒါကို နှစ်ဖက်ညှပ်ပြီး ကျွန်တော်တို့ တိုက်ခိုက်ခဲ့တာ”ဟု KRU တာဝန်ရှိသူက လူထုနွေဦးသို့ ပြောသည်။
Public Service Announcement
တိုက်ခိုက်မှုအတွင်း စစ်ကောင်စီမှ လက်နက်ကြီး များ အဆမတန်သုံးနေခဲ့သောကြောင့် ခေတ္တခဏ ပြန်လည် ဆုတ်ခွာပေးခဲ့ရကြောင်းလည်း KRU က အသိပေးသည်။
ထို့အပြင်တိုက်ပွဲအတွင်း အသုံးပြုခဲ့သော လက် နက်ကြီးကျည်ဆံများနှင့် လက်နက်ကျည်ဆံများ ပြန်လည် ဖြည့်တင်းနိုင်ရန် ပြည်သူများအနေဖြင့် ကူညီပေးရန် မေတ္တာရပ်ခံသည်။
