မန္တလေး – ကျောက်ဆည်လမ်းပိုင်းရှိ စဥ့်ကိုင်ပေါ်တော်မူဘုရားအနီး စစ်ကောင်စီယာဥ်တစ်စီးကို မဟာမိတ်တပ်ဖွဲ့များနှင့်အတူ စောင့်ကြိုပစ်ခတ်တိုက်ခိုက်ခဲ့ကြောင်း မြစ်ငယ် PDF က ပြောသည်။
ယနေ့(အောက်တိုဘာ ၃)နေ့လယ် ၂ နာရီ ၅၀ ခန့်က ပုလိပ်လျှပ်စစ်ရုံးမှတစ်ဆင့် ဘဏ်သို့ငွေသွင်းရန်လာသည့် လျှပ်စစ်ရုံးမန်နေဂျာနှင့် စစ်ကောင်စီတပ်သားသုံးဦးလိုက် ပါလာသော ယာဥ်တစ်စီးကို စဥ့်ကိုင်ပေါ်တော်မူဘုရားအနီး ပစ်ခတ်တိုက်ခိုက်ခဲ့ရာ အပြန်အလှန်ပစ်ခတ်မှု ၃မိနစ်ခန့်ဖြစ်ပွားခဲ့သည်ဟု ဆိုသည်။
အဆိုပါ စစ်ကောင်စီယာဥ်အား ပစ်ခတ်တိုက်ခိုက်ရာတွင် ကားခေါင်းခန်းမှလိုက်ပါလာသော စစ်ကောင်စီလက် အောက်ခံ ရဲစခန်းမှူးတစ်ဦးကို အသေပစ်ခတ်နိုင်ခဲ့ပြီး ထိခိုက်ဒဏ်ရာသူများလည်းရှိကြောင်း မြစ်ငယ် PDF က ပြောသည်။
“ (အသေပစ်နိုင်တာ)ပုလိပ်ရဲစခန်းမှူးပါ။ ကျနော်တို့ လက်နက်ငယ်တွေနဲ့ပဲ ပစ်ခတ်တိုက်ခိုက်ခဲ့တာဖြစ်ပါတယ်။ ရဲဘော်တွေအားလုံး အထိအခိုက်မရှိဘဲ ဘေးကင်းလုံခြုံရာ ပြန်ရောက်ကြပါပြီ” ဟု မြစ်ငယ် PDF မှ ရဲဘော်တစ်ဦးက ပြောသည်။
Public Service Announcement
အထက်ပါ စစ်ကောင်စီယာဥ်သည် မတရားသဖြင့် ကောက်ယူထားသော ပြည်သူ့ချွေးနည်းစာ မီတာခများကို ၎င်းတို့၏ရိက္ခာအဖြစ်ပြုလုပ်မည်ကို ခွင့်မပြုနိုင်သောကြောင့် ယခုကဲ့သို့ တိုက်ခိုက်ခဲ့ခြင်းဖြစ်သည်ဟု မြစ်ငယ် PDF က အသိပေးထားသည်။
