စစ်ကောင်စီနှင့်ပြန်ပူးပေါင်းသွားသည့် ဗိုလ်မှူးမျိုးမင်းထွန်းကို ပြည်သူ့သစ္စာဖောက်အဖြစ် သတ်မှတ်
စစ်ကောင်စီနှင့်ပြန်ပူးပေါင်းသွားသည့် ဗိုလ်မှူးမျိုးမင်းထွန်းကို ပြည်သူ့သစ္စာဖောက်အဖြစ် သတ်မှတ်NUGနှင့် ပူးပေါင်းပြီး CDM ကြိုဆိုလက်ခံရေးနှင့် ထောက်ပံ့ရေးကို ပြည်သူ့ ပံ့ပိုးမှုဖြင့် ပိုမိုလုပ်ဆောင်မည်ဟုအသိပေး
တော်လှန်ရေး ခံယူချက်၊ ယုံကြည်ချက်မရှိသူများ CDM ၌ မပါဝင်လာနိုင်ရေး စနစ်တကျ စိစစ် ဆောင်ရွက်မည်ဖြစ်ပြီး တော်လှန်ရေး အောင်မြင်နိုင်မှု အတွက် CDM တပ်မတော်သား စစ်စစ်တွေ အနေဖြင့် ပိုမိုကြိုးစား ဆောင်ရွက်သွားမည်ဟု ပြည်သူလူထုထံ အသိပေးကြောင်း CDM တပ်မတော်သား အစုအဖွဲ့များက ထုတ်ပြန် ကြေညာသည်။
ပြည်သူ့ရင်ခွင်၊ ပြည်သူ့ပန်းတိုင်၊ ပြည်သူ့သားကောင်းအဖွဲ့၊ People’s Soldiers Defense Force နဲ့ Breaking Brain Washed တို့က ယနေ့ (အောက်တိုဘာ ၇ရက်) ပူးပေါင်းထုတ်ပြန်ခဲ့ခြင်းဖြစ်သည်။
အောက်တိုဘာ ၅ရက်တွင် စစ်ကောင်စီ လက်အောက်ခံ မီဒီယာများနှင့် ဝါဒဖြန့်ချန်နယ်များက ဖြန့်ချိခဲ့သည့် ပြည်သူ့သစ္စာဖောက် ဗိုလ်မှူးမျိုးမင်းထွန်း၏ ရုပ်သံနှင့် ပတ်သက်ပြီး CDM တပ်မတော်သားများက ၎င်းတို့၏ သဘောထားများကို ထုတ်ပြန်ခဲ့ရာ ဗိုလ်မှူးမျိုးမင်းထွန်းကို ပြည်သူ့သစ္စာဖောက်အဖြစ် သတ်မှတ်ကြောင်း ဖော်ပြသည်။
နွေဦးတော်လှန်ရေးအင်အားစုများ၏ ခုခံစစ် ကြောင့် စစ်ကောင်စီ ရှေ့တန်းစခန်းများနှင့် စစ်ကြောင်းများ ထိခိုက်ကျဆုံးများပြားနေသည့် အခြေအနေတွင် ခမရ(၃၅၁)ယာယီတပ်ရင်းမှူး ဗိုလ်မှူးမျိုးမင်းထွန်းသည် ၎င်း၏ ဆန္ဒအရ CDM ပြုလုပ်ဖို့ ဆက်သွယ်လာခြင်းဖြစ်ကြောင်း၊ ၎င်း၏ ဇာတိ ဒီပဲယင်းမြို့နယ်က ကျေးရွာများကို အကြမ်းဖက်စစ်တပ်က မီးရှို့ဖျက်ဆီးမှုများရှိနေချိန်၊ စစ်ကောင်စီခေါင်းဆောင်များက လက်အောက်ငယ်သားများ၏ အသက်ကို ပဓာနမထားဘဲ အသေခံတိုက်ပွဲဝင်ရန် ညွှန်ကြားချက်များ ဆက်တိုက် ထွက်ပေါ်လာချိန်၌ CDM လုပ်ဆောင်ရန် ဆက်သွယ်လားခြင်းဖြစ်ကြောင်း ဖော်ပြထားသည်။
Public Service Announcement
ဗိုလ်မှူးမျိုးမင်းထွန်းအနေဖြင့် ပြည်သူ့ဘက် ပူးပေါင်းလာချိန်၌ ပြည်သူအများ၏ ထောက်ခံမှုကို ရခဲ့ပြီး ၎င်း နေထိုင် စားသောက်နိုင်ရေးအတွက် CDM တပ်မတော်သားများက တက်နိုင်သည့် ဘက်က ဝိုင်းဝန်း ဆောင်ရွက် ပေးခဲ့ကြောင်း၊ အမျိုးသားညီညွတ်ရေးအစိုးရ(NUG) နှင့် ပြည်သူများကလည်း လိုအပ်သည့် ထောက်ပံ့မှုများ ဖြည့်ဆည်းခဲ့ကြောင်း ထုတ်ပြန်ခဲ့သည်။
ဗိုလ်မှူးမျိုးမင်းထွန်းအနေဖြင့်တော်လှန်ရေးအင် အားစုများအတွက် ၎င်းသိရှိထားတဲ့ ပညာရပ်တွေနဲ့ အတွေ့အကြုံတွေကို တစုံတရာ မျှဝေခြင်းမရှိခဲ့သော်လည်း ပြည်သူ့ဘက် ပူးပေါင်းလာ၍ ၎င်း ဘ၀ လုံခြုံရေးနှင့် လိုအပ်ချက်အားလုံးကို တတိယ နိုင်ငံရောက် CDM တပ်မတော်သားများ၊ ပြည်ပရောက် ပြည်သူများ၏ ပူးပေါင်းဆောင်ရွက်မှုကြောင့် မကြာမီကာလအတွင်း တတိယ နိုင်ငံသို့ သွားရောက်ရတော့မည့် အခွင့်အရေးကို ရရှိထားသူဖြစ်ကြောင်း ဖော်ပြထားသည်။
ထို့အပြင် ဗိုလ်မှူးမျိုးမင်းထွန်းသည် တော်လှန် ရေးအပေါ် ယုံကြည်ချက်မရှိမှု၊ စိတ်ဓာတ်ပျော့ညံ့မှု၊ အခက်အခဲများကို ရင်ဆိုင်ဖြတ်ကျော်လိုစိတ် မရှိမှုနှင့် ၎င်း အသက်သေဆုံးနိုင်မှု ဖြစ်ပေါ်ခဲ့သည့် အခြေအနေများကို ဖုံးကွယ်ပြီး ပကတိ အမှန်တရားများကို မျက်ကွယ်ပြုကာ NUGနှင့် CDM ကူညီထောက်ပံ့ရေး လုပ်ငန်းများ ဆောင်ရွက်ပေးနေသည့် အဖွဲ့အစည်းများကို ထိုးနှက်တိုက်ခိုက်လိုသည့် ရည်ရွယ်ချက်ဖြင့် အကြမ်းဖက် စစ်ကောင်စီက မဟုတ်မမှန် လိမ်လည်ဝါဒဖြန့်ရန် အမိန့်ပေးခဲ့သည့် အတိုင်း ပြောဆိုခဲ့၍ ၎င်းကို ပြည်သူ့သစ္စာဖောက်အဖြစ် သတ်မှတ်လိုက်သည်ဟု CDM တပ်မတော်သားများက အသိပေးထုတ်ပြန်သည်။
ကရင်အမျိုးသားအစည်းအရုံး(KNU)သတင်းရင်းမြစ်ကလည်း CDM ဝင်ရောက်လာသည့် တပ်မတော်သားများကို ကြိုဆိုရမည်ဖြစ်သကဲ့သို့ လုံခြုံရေးအတွက်လည်း သတိထားရမည်ဟု ပြောကြားထားသည်။
ဗိုလ်မှူးမျိုးမင်းထွန်း ဖြစ်စဉ်နှင့် ပတ်သက်ပြီး အမှန်တိုင်း သိရှိစေနိုင်ရန် အတွက် အကြမ်းဖက် စစ်တပ်အတွင်းမှ ပြည်သူနှင့် ပူးပေါင်းရပ်တည်လျက်ရှိသည့် မိမိတို့၏ အမာခံ အတွင်းလူများ၏ အကူအညီနှင့် ပူးပေါင်းပါဝင်သူ အားလုံး ကို စုံစမ်းလျက်ရှိကြောင်း ထုတ်ပြန်ခဲ့ပြီး ဗိုလ်မှူးမျိုးမင်းထွန်း ဖြစ်စဉ်ကို သင်ခန်းစာယူကာ တော်လှန်ရေး ခံယူချက် ယုံကြည်ချက်မရှိတဲ့သူတွေ CDMမှာ မပါဝင်လာစေရန် ဆောင်ရွက်မည်ဟု ဖော်ပြသည်။
ထို့ပြင် အမျိုးသားညီညွတ်ရေးအစိုးရ(NUG)နှင့် ပူးပေါင်းပြီး တော်လှန်ရေး အောင်မြင်ရန် လမ်းစဖြစ်သည့် CDM ကြိုဆိုလက်ခံရေးနှင့် ထောက်ပံ့ရေးလုပ်ငန်းများကိုပြည်သူများ၏ ပံ့ပိုးကူညီမှုများနှင့် ပိုမိုလုပ်ဆောင်သွားမည်ဟု CDM တပ်မတော်သားများ က ထုတ်ပြန်ခဲ့သည်။
