စစ်ကိုင်းတိုင်း၊ မုံရွာ-မန္တလေးလမ်းပေါ်တွင် တိုက် ပြေးယာဥ်ကြောင့် လူနှစ်ဦးသေဆုံးခဲ့ရာ အဆိုပါတိုက် ပြေးသည့်ကားမှာ ဘုန်းကြီးကားဖြစ်နေပြီး ထိုကားအားတွေ့ရှိပါက အကြောင်းကြားပေးရန် မုံရွာမြို့နယ် ပြည်သူ့လုံခြုံရေးအဖွဲ့က မေတ္တာရပ်ခံသည်။
တိုက်သည့်ယာဥ်နံပါတ်မှာ 4G/9881 ဖြစ်ပြီး ယာဥ်မှတ်ပုံတင်Application၌ TOYOTA HILUX VIGO အမျိုးအစားဟု ဖော်ပြထားသည်။ ယာဥ်ပိုင်ဆိုင်သူမှာ ဘဒ္ဒန္တ ဂန္ဓမာလာ ဖြစ်ပြီး လိပ်စာမှာ မဟာကုသိုလ်တော်ဘုန်းကြီးကျောင်းဟု ရေးသွင်းထားသည်။
“ဒီကားဟာ မနက်ကမြေနဲမှာ လူ၂ယောက်ကိုတိုက်ပြီးထွက်ပြေးသွားတဲ့ကားပါ။ အတိုက်ခံရတဲ့လူ၂ယောက်ဟာလည်း နေရာမှာတင်သေဆုံးသွားတယ်လို့သိရပါတယ်။ တာဝန်ယူမှုမရှိဘဲ ထွက်ပြေးသွားတဲ့ကားဟာ မန်းလိုင်စင်နဲ့လို့သိရပါတယ်။ ဘုန်းကြီးကားလို့လည်းသိရပါတယ်။ တွေ့တဲ့နေရာမှာအကြောင်းကြားပေးကြပါ။ လက်ခံပြုပြင်ပေးတဲ့ဝပ်ရှော့များရှိပါကအကြောင်းကြားပေးကြပါ။”ဟု မုံရွာမြို့နယ် ပြည်သူ့လုံခြုံရေးအဖွဲ့က ပြောသည်။
ထို့အပြင် ပြည်သူများ ထိုကားကိုတွေ့သည့်နေရာ၌ အကြောင်းကြားပေးကြပါရန် မုံရွာမြို့နယ် ပြည်သူ့လုံခြုံရေးအဖွဲ့က မေတ္တာရပ်ခံသည်။
Public Service Announcement
“မနက်၈နာရီခွဲလောက်က နတ်လူထိပ်ပန်ကနေ စက်မှု့ဘက်တတ်သွားပါတယ်။ ကားရှေ့ခေါင်းကြီးပိန်လိမ်လို့ပါ နောက်မှာဘုန်းကြီးတစ်ပါးနဲ့မိန်းမတစ်ယောက်ထိုင်လိုက်သွားပါတယ်။”ဟု ဒေသခံတစ်ဦးက ပြောသည်။
အဆိုပါ 4W အမျိုးအစား အနက်ရောင်ယာဥ်သည် ယနေ့ အောက်တိုဘာလ ၁၈ရက်နေ့ နံနက် ၇ နာရီ ၄၅ မိနစ်ခန့်က မုံရွာ-မန္တလေးလမ်း မြေနဲကျေးရွာ၊ မြေနဲရွာတံတားအနီး နယူးအားမာန်ဘီယာဆိုင်ရှေ့တွင် အမျိုးသားနှစ်ဦးစီးလာသော Clickဆိုင်ကယ်အား တိုက်ပြီး ခဏရပ်ကြည့်ကာ မုံရွာဘက်သို့မောင်းသွားကြောင်း ဒေသခံများက ပြောသည်။
သာသနာ့ဝန်ထမ်းတစ်ယောက်ပါဝင်သော်လည်း တစ်စုံတစ်ရာတာဝန်ယူမှုမရှိဘဲ တိုက်ပြေးသွားသည့်အတွက် ဒေသခံများက ဝေဖန်နေကြသည်။
