မကွေးတိုင်း၊ ရေစကြိုမြို့နယ်တွင် စစ်ကောင်စီတပ်က စစ်ဘေးရှောင်တဲများကိုပါ မီးရှို့ဖျက်ဆီးသွားကြောင်း ဒေသခံများက ပြောသည်။
ယမန်နေ့(အောက်တိုဘာ ၂၃ ရက်)နံနက် ၃နာရီခန့်က စစ်ကောင်စီတပ်သားများနှင့် ပျူစောထီးများသည် ရေစကြိုမြို့နယ်၊ ကွမ်းစီးကန်ကျေးရွာသို့ အင်အား၈၀ခန့်ဖြင့် ဝင်ရောက်လာခဲ့သည်။
ထို့နောက် မွန်းလွဲ ၁နာရီခွဲခန့်တွင် ကွမ်းစီးကန်အနီး ကျောက်ထပ်အနောက်ဖက်ရှိ စစ်ဘေးရှောင်တဲစခန်းများကို ဝင်ရောက်မီးရှို့ ဖျက်ဆီးခဲ့ရာ တဲပေါင်း ၁၈လုံးကျော် မီးလောင်ကျွမ်းပျက်စီးသွားကြောင်း ဒေသခံများက ပြောသည်။
ထို့အပြင် စစ်ကောင်စီတပ်သည် စစ်ဘေးရှောင်များ၏ ဆိုင်ကယ်နှင့် လှည်းများကိုပါ မောင်းယူသွားပြီး တန်ဖိုးရှိပစ္စည်းများကိုလည်း သိမ်းယူသွားကြောင်း ဒေသခံများက ပြောသည်။
Public Service Announcement
“အဲဒီစစ်ကြောင်းက နည်းပညာတက္ကသိုလ်(ပခုက္ကူ)မှာ တပ်စွဲထားတဲ့ စစ်တပ်။ ရွာသားတွေလည်း ဖမ်းသွားတယ်ပြောတယ်။”ဟု ရေစကြိုဒေသခံတစ်ဦးက ပြောသည်။
ထို့အပြင် စစ်ကောင်စီတပ်သည် အောက်တိုဘာ ၁၇ ရက်ကလည်း ရေစကြိုမြို့နယ် တောင်ဦးကျေးရွာရှိ နေအိမ် ၁၀လုံးကို မီးရှို့ဖျက်ဆီးသွားခဲ့သေးသည်။
စစ်ကောင်စီတပ်သည် ယခုအောက်တိုဘာအတွင်း၌ မကွေးတိုင်း၊ ပခုက္ကူခရိုင်အတွင်းရှိ ပခုက္ကူ၊ ရေစကြို၊ မြောင်၊ ပေါက်နယ်များရှိ ကျေးရွာများအား စစ်ကြောင်းထိုးဖျက်ဆီးမှုများ ပြုလုပ်နေ၍ ဒေသခံအများအပြား ထွက်ပြေးတိမ်းရှောင်နေရသည်။
