ဝမ်းတွင်းမြို့တွင် စစ်ကောင်စီတပ်က NLD အမာခံများနှင့် ပြည်သူများ ဖမ်းဆီးငွေညှစ်နေ

မန္တလေးတိုင်း၊ ဝမ်းတွင်းမြို့နယ်တွင် စစ်ကောင်စီတပ်က NLDပါတီအမာခံများနှင့် ပြည်သူများအား တရားမဲ့ဖမ်းဆီးပြီး ငွေညှစ်နေကြောင်း ဒေသတွင်းသတင်းရင်းမြစ်များက ပြောသည်။

ပြီးခဲ့သည့် အောက်တိုဘာ ၉ ရက်က ဝမ်းတွင်းမြို့မရဲစခန်း ယာယီစခန်းမှူးနှင့် အောက်တိုဘာ ၁၇ ရက်က မြို့နယ်အုပ်ချုပ်ရေးမှူးတို့ သုတ်သင်ရှင်းလင်းခံရပြီးနောက် စစ်ကောင်စီတပ်က ဖမ်းဆီးမှုများ ပိုမိုပြုလုပ်လာခဲ့ကြောင်း ဒေသခံများက ပြောသည်။

ဝမ်းတွင်းမြို့နယ်တွင် တစ်ရက်လျှင် ဒေသခံ ခုနစ်ဦးခန့်ဖမ်းဆီးခံနေရပြီး လက်ရှိ ၉၀ ကျော် ဖမ်းဆီးခံထားရကြောင်း၊ အချို့မှာ ကျပ် ၅သိန်းပေးဆောင်၍ ပြန်လွတ်လာသ​ည်ဟု Voice Of Wundwin အဖွဲ့က ဆိုသည်။

” NLD အမာခံတွေကိုပဲရွေးပြီးဖမ်းကြတယ်။ ပိုက်ဆံရှိရင်ရှိသလို ငွေအများကြီးပေးရတယ်။ တချို့ဆို ၁၉သိန်း။ အပြစ်မဲ့ပြည်သူတွေကို အကြောင်းပြချက်အမျိုးမျိုးနဲ့အကုန်ဖမ်းတာ သဲလွန်စမရရင် ငွေရမယ်ဆိုပြီး လုပ်နေတာ တစ်ရက်ကို ပျမ်းမျှ ခုနစ်ယောက်နှုန်းဖမ်းပါတယ်။”ဟု Voice Of Wundwin အဖွဲ့ဝင်တစ်ဦးက ပြောသည်။

Public Service Announcement

NLDပါတီ အမာခံများအပြင် လမ်းသွား၊လမ်းလာလူငယ်များကိုလည်း ဖမ်းဆီးရိုက်နှက်ခြင်း၊ စစ်ကြောရေးသို့ပို့ဆောင်ခြင်းများ ပြုလုပ်နေကြောင်း ​ဒေသခံများက ပြောသည်။

“တချို့အပြစ်မရှိတဲ့သူတွေ ယောက်ျားလေးတွေဆို ဖုန်းထဲမှာ နိုင်ငံရေးနဲ့ပတ်သတ်တာတစ်ခုခုတွေ့လိုက်တာနဲ့ အဲ့ကလေးကို နေရာတင် လက်ပြန်ကြိုးတုတ်ပြီးရိုက်တာ။ ပြီးရင် ဖုန်းထဲမှာရှိတဲ့နံပတ်အကုန်ခေါ်ပြီး တစ်ယောက်ချင်းခေါ်ခိုင်းတာ။ တချို့တွေဆိုစစ်ကြောရေးထိရောက်သွားကြတယ်။ ကျွန်တော်တို့သတင်းရသလောက်တော့ ၈ ယောက်လောက် စစ်ကြောရေးကိုရောက်တယ်။”ဟု ဝမ်းတွင်းနယ်ခံတစ်ဦးက ပြောသည်။

မန္တလေးတိုင်းအတွင်းရှိ NLD ပါတီဝင်များနှင့် NLDအမာခံများကို စစ်ကောင်စီလက်အောက်ခံသွေးသောက်အဖွဲ့များက ဖမ်းဆီးသတ်ဖြတ်ခြင်းများလည်း ဖြစ်ပေါ်နေသည်။

ဝမ်းတွင်းမြို့နယ်သည် စစ်ကောင်စီတပ်အား ခုခံတိုက်ခိုက်မှုအားကောင်းသော ဒေသတစ်ခုဖြစ်သည်။