အကြမ်းဖက်စစ်ကောင်စီ၏ လေကြောင်းတိုက်ခိုက်မှုကြောင့် အပြစ်မဲ့ပြည်သူ ၅၀ ကျော် သေဆုံးခဲ့မှုအတွက် ဝမ်းနည်းမှုကို တော်လှန်ရေးခွန်အားအဖြစ်အရှိန်မြှင့်တင်ကြရန် အထွေထွေသပိတ် ပေါင်းစပ်ညှိနှိုင်းရေးကော်မတီ(GSCB)က ယမန်နေ့တွင် တိုက်တွန်းထုတ်ပြန်သည်။
ပြီးခဲ့သည့် အောက်တိုဘာ ၂၃ ၌ ကချင်ပြည်နယ်၊ ဖားကန့်မြို့ရှိ အနန့်ပါဒေသ ကံဆီးကျေးရွာတွင် ကချင်လွတ်လပ်ရေးအဖွဲ့ (KIO)၏ (၆၂)နှစ်ပြည့်အထိမ်းအမှတ်အကြို ဂီတဖျော်ဖြေပွဲပြုလုပ်စဥ် အကြမ်းဖက်စစ်ကောင်စီတပ်မှ ဂျက်တိုက်လေယာဉ်များဖြင့် ပစ်ခက်တိုက်ခိုက်ခဲ့သဖြင့် အရပ်သားပြည်သူ ၅၀ကျော် အသက်ဆုံးရှုံးခဲ့ရပြီး အများအပြား ထိခိုက်ဒဏ်ရာရရှိခဲ့သည်။
ယင်းဖြစ်ရပ်သည် စစ်အာဏာရှင်တို့က ၎င်းတို့ အာဏာတည်မြဲနိုင်ရန် မည့်သည့်စစ်ရာဇဝတ်မှုကိုမျှ ဂရုမပြုဘဲ အဆုံးစွန်ထိရက်စက်ယုတ်မာသွားမည်ဖြစ်ကြောင်း အကြိမ်ကြိမ်အဖန်ဖန်ပြသနေခြင်းဟု GSCB က ဆိုသည်။
သို့သော် မည်ကဲ့သို့သော ရက်စက်မှုမျိုးကမှ တော်လှန်သောအရှိန်အဟုန်ကို တားဆီးနိုင်မည် မဟုတ်ကြောင်း GSCB က ဖော်ပြထားသည်။
Public Service Announcement
“ထိုကဲ့သော ခက်ခဲကြမ်းတမ်းသော အခြေအနေများက ကျွန်ုပ်တို့ ညီနောင်တိုင်းရင်းသားများအား ပို၍ သွေးစည်းညီညွတ်မှုကိုသာ ဖြစ်စေတာကြောင့် လက်သည်းဆိတ် လက်ထိပ်ကနာဆိုသလို ကချင်လူထုနှင့် အတူရပ်တည်ကြောင်းပြသ၍ ကျွန်ုပ်တို့ရဲ့ သွေးစည်းညီညွတ်မှုကို ထုတ်ဖော်ပြသရန် အချိန်တန်ပြီ ဖြစ်ပါတယ် “ဟု တော်လှန်ရေးအင်အားစုများက ဆိုသည်။
ထို့ကြောင့် ဖားကန့်နယ် အနန့်ပါဒေသလေကြောင်းပစ်ခတ်မှုအတွက် ဝမ်းနည်းကြေကွဲမှု ၊ နာကြည်းစိတ်တို့အား တော်လှန်ခွန်အားအဖြစ် အသွင်ပြောင်း၍ တော်လှန်ရေးအဟုန်အား အရှိန်မြှင့်တိုက်ပွဲဝင်ကြပါရန် GSCB က တိုက်တွန်းထားသည်။
