စစ်တပ်အာဏာသိမ်းပြီးနောက်ပိုင်း ပြည်တွင်းနေရပ်စွန့်ခွာသူဦးရေသည် ၁.၁ သန်းကျော်(၁၁၀၉၃၀၀) ရှိလာပြီး အာဏာသိမ်းမသိမ်းမီ အရေအတွက်နှင့်ထပ်ပေါင်းပါက နိုင်ငံတဝန်းစုစုပေါင်း ၁.၄ သန်းကျော်(၁၄၃၉၇၀၀)ရှိပြီဟု ကုလသမဂ္ဂလူသားချင်းစာနာမှုဆိုင်ရာညှိနှိုင်းရေးရုံး (OCHA) က အောက်တိုဘာ ၂၇ ရက်တွင် ထုတ်ပြန်သည်။
အဆိုပါကိန်းဂဏန်းများသည် အောက်တိုဘာ၂၄ ရက်အထိ OCHA ၏ ကောက်ခံရရှိမှု စာရင်းဖြစ်ပြီး ၎င်းတို့ပြုစုချက်အရ အာဏာသိမ်းပြီးနောက်ပိုင်း စစ်ကိုင်းတိုင်းတွင် ၆ သိန်းကျော်(၆၁၂၄၀၀) နှင့် အများဆုံးနေရပ်စွန့်ခွာမှုဖြစ်ပေါ်ခဲ့သည်။ ဒုတိယနေရပ်စွန့်ခွာမှုအများဆုံးမှာ မကွေးတိုင်းဖြစ်ပြီး ယင်းတိုင်းတွင် ၁ သိန်းကျော်(၁၁၁၈၀၀)ရှိကာ အဆိုပါတိုင်းနှစ်တိုင်းတွင် အာဏာမသိမ်းမီက နေရပ်စွန့်ခွာသူ တစ်ဦးမျှ မရှိခဲ့ပေ။
ကုလ၏ နေရပ်စွန့်ခွာရသူအရေအတွက်မှာ တိုင်းရင်းသားဒေသများရှိစစ်ဘေးရှောင်များကပြုစုသောအရေအတွက်များစွာလျော့နည်းနေသည်။KNU ထိန်းချုပ်နယ်မြေများတွင်ပင် စစ်ဘေးရှောင်ပြည်သူ ၃ သိန်းကကျော်ပြီး ၊ကရင်နီ(ကယား)ပြည်နယ်တွင်စစ်ဘေးရှောင် ၂ သိန်းကျော်ရှိကြောင်းမြေပြင်တွင် ကူညီသောအဖွဲ့များကထုတ်ပြန်ထားသည်။
“နိုင်ငံတဝှမ်းမှာ ဖြစ်ပွားနေတဲ့တိုက်ပွဲတွေကြောင့် အရပ်သားသေဆုံးမှုတွေ၊ အရပ်သားပြည်သူပိုင်ပစ္စည်းပျက်စီးမှုတွေနဲ့ အိုးအိမ်စွန့်ခွါထွက်ပြေးမှုတွေ ဆက်လက်ဖြစ်ပွားနေပြီး လူသားချင်းစာနာမှုဆိုင်ရာလိုအပ်ချက်တွေလည်း ပိုမိုများပြားလာနေပါတယ်” ဟု OCHA က ဆိုသည်။
Public Service Announcement
ရန်ကုန်တိုင်း၊ မန္တလေးတိုင်းနှင့် ဧရာဝတီတိုင်းတို့မှ လွဲ၍ ကျန်တိုင်းနှင့် ပြည်နယ် ၁၁ ခု၌ နေရပ်စွန့်ခွာထွက်ပြေးသူများရှိနေခဲ့ပြီးဖြစ်သည်။ အာဏာမသိမ်းမီကတည်းက စစ်တပ်နှင့် တိုင်းရင်းသားတော်လှန်ရေးအဖွဲ့များအကြားဖြစ်ပွားသည့် တိုက်ပွဲများကြောင့် ရှမ်းမြောက်၊ ရခိုင်မြောက်ပိုင်း၊ ပဲခူးအရှေ့ပိုင်း၊ ချင်းပြည်နယ်၊ ကရင်၊ ကချင် နှင့် ရခိုင်အလယ်ပိုင်း တို့၌ စုစုပေါင်း နေရပ်စွန့်ခွာသူဦးရေ ၃၃၀၄၀၀ ရှိနေခဲ့သည်။
ရခိုင်ပြည်နယ်မြောက်ပိုင်းရှိ မြို့နယ်များနှင့် စစ်တွေအကြားရှိ ရေကြောင်းလမ်းအပါအဝင် အဓိကလမ်းပိုင်းများကို စစ်တပ်က ပိတ်ဆို့ထားပြီး အသွားအလာများကို ကန့်သတ်ထားသဖြင့် အကူအညီလိုအပ်နေသူများထံ လူသားချင်းစာနာမှုအကူအညီများ ရောက်ရှိရန် အဟန့်အတားများဖြစ်ပေါ်နေကြောင်း OCHA က ထုတ်ပြန်သည်။
“ဒါ့အပြင် စစ်တွေနဲ့ ပေါက်တောအကြား အရပ်သားပြည်သူတွေ ရေလမ်းအသုံးပြုမှုကို အောက်တိုဘာလ ၁၉ရက်နေ့ကစပြီး အကန့်အသတ်မရှိ ရပ်ဆိုင်းထားကြောင်း သိရှိပါတယ်။ အလားတူ မြန်မာနိုင်ငံ အနောက်မြောက်ပိုင်းနဲ့ အရှေ့တောင်ပိုင်းတို့မှာလည်း ပစ်ခတ်တိုက်ခိုက်မှုတွေ ဆက်လက်ဖြစ်ပွားနေတာကြောင့် လူသားချင်းစာနာမှုဆိုင်ရာ လိုအပ်ချက်တွေဖြစ်ပေါ်နေပြီး အရပ်သားပြည်သူတွေရဲ့ အသက်အိုးအိမ်စည်းစိမ်အကာအကွယ်ရရှိရေးကို ကြီးမားစွာခြိမ်းခြောက်နေဆဲဖြစ်ပါတယ်” ဟု OCHA က ဆိုသည်။
အမျိုးသားညီညွတ်ရေးအစိုးရ NUG က လူသားချင်း စာနာထောက်ထားမှုဆိုင်ရာကိစ္စရပ်များအတွက် တရုတ်၊ အမေရိကန်၊ ထိုင်း၊ အိန္ဒိယ၊ အင်ဒိုနီးရှားနှင့် ဗြိတိန်နိုင်ငံတို့ကို ဖိတ်ကြား ခေါ်ယူကျင်းပရန် အာဆီယံနှင့် အာဆီယံ၏မိတ်ဆွေများကိုတောင်းဆိုထားပြီး ( ASEAN Coordination Center for Humanitarian Assistance on Disaster Management) AHA စင်တာအား လူသားချင်း စာနာ ထောက်ထား မှုဆိုင်ရာ အကူအညီပေးရေးနှင့် အရေးပေါ်တုံ့ပြန်မှုဆိုင်ရာ ချဉ်းကပ်မှုများတွင် NUG နှင့် ပွင့်လင်းစွာ ထိတွေ့ဆက်ဆံနိုင်စေရန် အာဆီယံကို တိုက်တွန်းထားကြောင်း အောက်တိုဘာ ၂၈ ရက်တွင် ထုတ်ပြန်သည်။
