မကွေးတိုင်း မြိုင်မြို့နယ်တောင်ပိုင်းရှိ နှမ်းဆီကန် ကျေးရွာအား စစ်ကောင်စီတပ်က မီးရှို့ဖျက်ဆီး ၍ နေအိမ် ၁၂လုံးမီးလောင်ပျက်စီးဆုံးရှုံးခဲ့ကြောင်း ဒေသခံများက ပြောသည်။
နိုဝင်ဘာ၁၂ ရက် နံနက်ပိုင်းက သရက်ကန်ရွာ ပျူစောထီးစခန်းမှ မြေပဲဖော်ထွက်လာသော ပျူစောထီးများကို ဒေသခံကာကွယ်ရေးအဖွဲ့များက အလစ်အငိုက်ဝင်ရောက် ပစ်ခတ်တိုက်ခိုက်ရာ အပြန်အလှန်ပစ်ခတ်မှုဖြစ်ပွားပြီး ပျူခြောက်ဦး သေဆုံးခဲ့သည်။
ထိုဖြစ်စဥ်နှင့်ပတ်သက်၍ တွင်းမရွာနှင့် သရက်ကန်ကျေးရွာတို့မှ ပျူများ၊ စစ်ကောင်စီတပ် အင်အား ၆၀ခန့်ဖြင့် အနီးရှိ နှမ်းဆီကန်ကျေးရွာကို စစ်ကြောင်းထိုးဝင်ရောက်လာပြီး ရမ်းသမ်းပစ်ခတ်ခဲ့ကြောင်း၊ ထို့နောက် နေအိမ်များအား မီးရှို့ဖျက်ဆီးသွားကြောင်း ဒေသခံများက ပြောသည်။
“ပြည်သူတစ်ဦးကို ဖမ်းပြီး သူတို့မီးရှို့ချင်တဲ့သူတွေရဲ့ အိမ်တွေကို နာမည်စာရင်းနဲ့ လိုက်ပြခိုင်းတာလို့ သိရပါတယ်။”ဟု We Love Myaing အဖွဲ့ဝင်တစ်ဦးက ပြောသည်။
Public Service Announcement
စစ်ကောင်စီတပ်များက သေနတ်ဖြင့် ကျေးရွာအတွင်း အချက် ၁၀၀ခန့် ရမ်းသမ်းပစ်ခတ်ခဲ့ပြီး ပြည်သူထိခိုက်မှုမရှိကြောင်း သိရသည်။
နှမ်းဆီကန်ရွာသည် သြဂုတ်အတွင်းကလည်း စစ်ကောင်စီတပ်၏ မီးရှိ့ဖျက်ဆီးမှုခံခဲ့ရပြီး နေအိမ်ခုနစ်လုံး မီးလောင်ပျက်စီးခဲ့ကြောင်း We Love Myaing အဖွဲ့က ပြောသည်။
