အာဏာသိမ်း မြန်မာစစ်ကောင်စီရဲ့ ရက်စက်ကြမ်းကြုတ်မှုတွေနဲ့ လူ့အခွင့်အရေးချိုးဖောက်မှုတွေကို အမေရိကန်ဒုသမ္မတ ကင်မလာဟဲရစ်က ရှုတ်ချလိုက်ပါတယ်။
ထိုင်းနိုင်ငံကိုရောက်ရှိနေတဲ့ ကန်ဒုသမ္မတဟာ ထိုင်းဝန်ကြီးချုပ်နဲ့ သီးသန့်တွေ့ဆုံရာ မြန်မာ့အရေးကို ထည့်သွင်းဆွေးနွေးခဲ့ပါတယ်။
မြန်မာနိုင်ငံမှာ အခြေအနေတွေ ပိုမိုဆိုးရွားလာနေကြောင်း နဲ့ မြန်မာပြည်သူတွေရဲ့ ဒီမိုကရေစီအရေး ကြိုးပမ်းမှုအပေါ် နိုင်ငံတကာအသိုင်းအဝိုင်းရဲ့ထောက်ခံမှုကို အလေး ထား ကြောင်း ထိုင်းဝန်ကြီးချုပ်နဲ့ ဆွေးနွေးခဲ့လို့ အိမ်ဖြူတော်က မနေ့က ထုတ်ပြန်ပါတယ်။
ဒါအပြင်အမေရိကန်ဟာ မြန်မာပြည်သူတွေနဲ့အတူ ရပ်တည်ကြောင်းကိုလည်း ကန်ဒုသမ္မတက ထိုင်းဝန်ကြီးချုပ်ကိုထပ်လောင်းအသိပေးခဲ့တယ်လို့သိရပါတယ်။
အဲဒီတွေ့ဆုံမှုမှာ စစ်ကောင်စီရဲ့ ရက်စက်ကြမ်းကြုတ်မှုတွေကို အမေရိကန်အစိုးရက ရှုတ်ချ ခဲ့ပါသေးတယ်။
ထိုင်းနိုင်ငံမှာ ကျင်းပတဲ့ အာရှ − ပစိဖိတ်နိုင်ငံများ စီးပွားရေးပူးပေါင်းဆောင်ရွက်မှု အစည်းအဝေးကို လာတက်တဲ့ ကန်ဒုသမ္မတဟာ ဖိလစ်ပိုင်နိုင်ငံကိုလည်းသွားရောက်ဦးမှာပါ။
ဖိလစ်ပိုင်ခရီးစဉ်မှာလည်းမြန်မာ့အရေးကိုထည့်သွင်းဆွေးနွေးမယ်လို့သိရပါတယ်။