စစ်ကိုင်းတိုင်း၊ မြင်းမူမြို့ မြန်မာ့စီးပွားရေးဘဏ် ရှိ စစ်ကောင်စီတပ်ဖွဲ့ဝင်များ ဝိုင်းဖွဲ့အရက်သောက်နေစဥ် လက်ပစ်ဗုံးပစ် တိုက်ခိုက်ခဲ့ကြောင်း ZERO ပြောက်ကျားတပ်ဖွဲ့ (မြင်းခြံ) ခေါင်းဆောင် ကိုသက်ကြီးက ပြောသည်။
ယနေ့ (နိုဝင်ဘာလ ၂၂ ရက်)ည ၇ နာရီ ၃၅မိနစ်ခန့်က မြင်းမူမြို့ မြန်မာ့စီးပွားရေးဘဏ်တွင် ကင်းစောင့်နေသော စစ်ကောင်စီတပ်သား ခုနစ်ဦးဝိုင်းဖွဲ့အရက်သောက်နေစဉ် လက်ပစ်ဗုံးတစ်လုံးပစ်ပေါက်တိုက်ခိုက်ခဲ့ရာ အရက်ဝိုင်းအတွင်းကျရောက်ပေါက် ကွဲခဲ့ကြောင်း ZERO ပြောက်ကျားတပ်ဖွဲ့ခေါင်းဆောင် ကိုသက်ကြီးက ပြောသည်။
ထိုသို့ ပေါက်ကွဲမှုကြောင့် စစ်ကောင်စီတပ်သား ငါးဦး သေဆုံးပြီး နှစ်ဦးအပြင်းအထန်ဒဏ်ရာရသည်ဟု သတင်းရကြောင်း ပြောက်ကျားတပ်ဖွဲ့ခေါင်းဆောင် က ဆိုသည်။
Public Service Announcement
၎င်းတို့မှာ ပြန်လည်ပစ်ခတ်နိုင်ခြင်းမရှိဘဲ စာသင် ကျောင်းတွင် တပ်စွဲထားသော စစ်အုပ်စုက ၁၅ ချက်ခန့် ပစ်ခတ်သံကြားသည်ဟု ကိုသက်ကြီးက ပြောသည်။
“ကျွန်တော်တို့ တိုက်ပွဲများဆက်လက်ဖော်ဆောင် သွားပါ့မယ်။”ဟု ZERO ပြောက်ကျားတပ်ဖွဲ့ခေါင်းဆောင် ကိုသက်ကြီးက ပြောသည်။
ထို့အပြင် ရဲဘော်များအထိအခိုက်မရှိ ဆုတ်ခွာနိုင်ခဲ့ကြောင်း၊ ယင်း စစ်ဆင်ရေးကို ZERO ပြောက်ကျားတပ်ဖွဲ့ (မြင်းခြံ) တပ်ရင်း -၇ မြင်းခြံခရိုင်နှင့် TRUE Fighter အဖွဲ့ တပ်ခွဲ (၃) တို့ပူးပေါင်းဆောင်ရွက်ခဲ့ခြင်းဖြစ်ကြောင်း အသိပေးသည်။
မြင်းမူမြို့မြန်မာ့စီးပွားရေးဘဏ်ရှိ စစ်ကောင်စီတပ်များသည် ယခုလဆန်းပိုင်းကလည်း တိုက်ခိုက်ခံခဲ့ရသေးသည်။
