ဂျပန်က စစ်ကောင်စီသံရုံး နိုင်ငံကူးလက်မှတ် ကုန်ကျစရိတ်တိုးကောက်မယ်

ဂျပန်ရောက်မြန်မာတွေ နိုင်ငံကူးလက်မှတ် (Passport)သက်တမ်းတိုးတာ ၊ ပျောက်ဆုံးလျှောက်ထားတာတွေကို ကုန်ကျစရိတ်တိုးကောက်မယ်လို့ တိုကျိုမှာရှိတဲ့စစ်ကောင်စီသံရုံးကကြေညာလိုက်ပါတယ်။

တိုးမြှင့်ကောက်ခံတာကိုမနေ့က ဒီဇင်ဘာလ ၁ ရက်ကစတင်တယ်လို့လည်းအဲဒီကြေညာချက်မှာဖော်ပြပါတယ်။

စက်နဲ့ဖတ်ရှုစစ်ဆေးနိုင်တဲ့ သာမန်နိုင်ငံကူးလက်မှတ်သက်တမ်းတိုးတာကို ယခင် ယန်း ၃,၀၀၀ ကနေ ယခု ယန်း ၄,၀၀၀ ထိတိုးကောက်မှာဖြစ်သလို ပျောက်ဆုံးလျှောက်ထားတာကိုလည်း ယခင်ယန်း ၁၀,၀၀၀ ကနေ ယန်း ၁၂,၀၀၀ ထိ စစ်ကောင်စီသံရုံးက တိုးကောက်မှာဖြစ်ပါတယ်။

ဒီလို ကုန်ကျစရိတ်တိုးကောက်ရတာဟာ ဂျပန်ယန်းဈေးနှုန်းအပြောင်းအလဲကြောင့်ဖြစ်တယ်လို့ စစ်ကောင်စီက ဆိုထားပါတယ်။

Public Service Announcement

ဂျပန်မှာ မြန်မာနိုင်ငံသား သုံးသောင်းခွဲကျော်နေထိုင်နေတယ်လို့ ဂျပန်အစိုးရရဲ့စာရင်းတွေအရသိရပါတယ်။

အမျိုးသားညီညွှတ်ရေးအစိုးရ (NUG) ရဲ့ကိုယ်စားလှယ်ရုံးကိုဂျပန်မှာ ဖွင့်ထားပေမယ့် နိုင်ငံကူးလက်မှတ် ကိစ္စနဲ့ပတ်သက်ပြီး လတ်တလော ဆောင်ရွက်ပေးလို့မရသေးကြောင်း အဲဒီ NUG ကိုယ်စားလှယ်ရုံးက အသိပေးထားပါတယ်။