ငါးရက်အတွင်း ကျေးရွာ ၅ရွာကို စစ်ကောင်စီတပ်မီးရှို့ခဲ့
ငါးရက်အတွင်း ကျေးရွာ ၅ရွာကို စစ်ကောင်စီတပ်မီးရှို့ခဲ့စစ်ကိုင်းတိုင်း အင်းတော်မြို့နယ် စက်တောကုန်းရွာကို စစ်ကောင်စီတပ်က ယနေ့(ဒီဇင်ဘာ ၂၀ရက်) နံနက်တွင် မီးရှို့နေကြောင်း အင်းတော် ပြည်သူ့ကာကွယ်ရေးတပ်(PDF) ရဲဘော်က ပြောသည်။
“လက်ရှိအခြေအနေက တစ်ရွာလုံးနီးပါးလောက် တောင် လောင်သွားပြီလို့ပြောနေတယ်”ဟု ၎င်းက ဆိုသည်။
စစ်ကောင်စီတပ်သည် အင်းတော်နယ်ကို ဒီဇင်ဘာ ၁၆ရက်မှစ၍ ကျေးရွာများကို စစ်ကြောင်းထိုးပြီး လိုက်လံမီးရှို့နေရာ ဒေသခံ PDFနှင့် ကချင်လွတ်လပ်ရေးတပ်မတော်(KIA)တို့က ပူးပေါင်းခုခံခဲ့၍ တိုက်ပွဲများဖြစ်ပွားလျက်ရှိသည်။
အင်းတော်မြို့နယ်ရှိ ဂျုံးဂျုံးကျရွာသစ်၊ ဂျုံးဂျုံးကျရွာမ၊ ပိန်းအင်းရွာ၊ မအူကုန်းကျေးရွာတို့ကို စစ်ကောင်စီတပ်က မီးရှို့ခဲ့၍ ပြည်သူလူထုနေအိမ်များ ပျက်စီးခဲ့သည်။ ညောင်ကုန်းရွာ၊ ဂျုံးဂျုံးကျရွာ နှင့် ပိန်းအင်းရွာများအနီး၌ ထိတွေ့တိုက်ပွဲများ ဖြစ်ခဲ့ပြီး ဒီဇင်ဘာ ၁၇ရက် ဂျုံးဂျုံးကျရွာအနီး တိုက်ပွဲ၌ စစ်ကောင်စီတပ်က သေဆုံးထိခိုက်များပြားခဲ့သည်ဟုဆိုသည်။
Public Service Announcement
“အရင်တိုက်ပွဲဖြစ်တဲ့ စစ်ကြောင်းတော့ မဟုတ် ဘူး။ သူတို့ကို စစ်ကူလာတဲ့ စစ်ကြောင်းပေါ့။အင်အား ၁၀၀ ကျော်လောက်တော့ ပါတယ်”ဟု အင်းတော် PDFက စက်တောကုန်းရွာ မီးရှို့နေသည့် စစ်ကြောင်း၏ အခြေအနေကို ပြောပြသည်။
လက်ရှိ အခြေအနေများအရ တိုက်ပွဲများ ဆက်လက်ဖြစ်ပွားလာနိုင်ကြောင်းလည်း ၎င်းက အသိပေးသည်။
