စစ်တပ်အသုံးစရိတ် ကျပ်ဘီလီယံ ၄၄၀ ကျော်ထပ်သုံးမယ်

တစ်နိုင်ငံလုံးအတိုင်းအတာနဲ့ တော်လှန်ပုန်ကန်မှုကိုရင်ဆိုင်နေရတဲ့ စစ်ကောင်စီဟာ ဘတ်ဂျက်နှစ် ကုန်ခါနီး ၃ လအလိုမှာ စစ်တပ်အသုံးစရိတ် ကျပ်ဘီလီယံ ၄၄၀ ကျော် ထပ်မံသုံးစွဲမယ်လို့ ကြေညာပါတယ်။

ဒီနှစ်ဘတ်ဂျက်ရဲ့ နောက်တိုးဘတ်ဂျက်မှာ ဝန်ကြီးဌာနတွေနဲ့ ဦးစီးဌာနတွေအတွက် စစ်ကောင်စီက ကျပ်ဘီလီယံ ၁,၁၀၀ ကျော်သုံးစွဲမယ်လို့ ဒီဇင်ဘာလ ၂၉ ရက်ထုတ် စစ်ကောင်စီသတင်းစာမှာဖော်ပြပါတယ်။

အဲဒီဘီလီယံ ၁,၁၀၀ ကျော်ထဲက ၃ ပုံ ၁ပုံကျော်ကို စစ်တပ်အသုံးစရိတ်အတွက် သုံးစွဲမှာ တွေ့ရပါတယ်။

ပြီးခဲ့တဲ့ ဧပြီလကတင် စစ်တပ်အသုံးစရိတ် ကျပ်ဘီလီယံ ၃၇၀၀ ကျော် သုံးစွဲဖို့ စစ်ကောင်စီခေါင်းဆောင်က ကိုယ်တိုင်လက်မှတ်ထိုးပြီး ခွင့်ပြုပေးခဲ့ပါသေးတယ်။

Public Service Announcement

ဒါကြောင့် လာမယ့်နှစ် မတ်လကုန်အထိသာ သက်တမ်းရှိမယ့် ၂၀၂၂ − ၂၀၂၃ ဘတ်ဂျက်နှစ် တစ်နှစ်လုံး မှာ စစ်တပ်အသုံးစရိတ်ဟာ ဘီလီယံ ၄၀၀၀ ကျော်ထိ ဖြစ်သွားပါတယ်။

ဒီလို စစ်အသုံးစရိတ် တိုးမြှင့် သုံးစွဲတဲ့ စစ်ကောင်စီဟာ တိုင်းပြည်အတွက်အရေးကြီး တဲ့ ပညာရေးနဲ့ ကျန်းမာရေးကဏ္ဍ အသုံးစရိတ်ကိုတော့အနည်းငယ်သာသုံးပြီးလျစ်လျုရှုထားပါတယ်။

နောက်တိုးဘတ်ဂျက်မှာ ကျန်းမာရေးအသုံးစရိတ် ကျပ်သန်း ၁,၂၀၀ သာရှိပြီး ပညာရေးအသုံးစရိတ်ဟာလည်း ကျပ်သန်း ၉၇,၀၀၀ သာ စစ်ကောင်စီက သုံးမှာပါ။

မြန်မာနိုင်ငံမှာ စစ်တပ်ရဲ့အသုံးစရိတ်ဟာ နှစ်စဉ်ဆိုသလို ပညာရေး ၊ကျန်းမာရေး ကဏ္ဍ ၂ ရပ်မှာ သုံးစွဲမယ့် ပမာဏထက်များပါတယ်။

စစ်အာဏာမသိမ်းခင်က NLD အစိုးရ နောက်ဆုံးရေးဆွဲခဲ့တဲ့ ၂၀၂၀ − ၂၁ ဘတ်ဂျက်မှာဆိုရင် စစ်တပ်အသုံးစရိတ်ဟာ ကျပ်ဘီလီယံ ၃၄၀၀ ကျော်ရှိခဲ့ပါတယ်။

ဘတ်ဂျက်ကို စိစစ်ဖြတ်တောက်တဲ့ လွှတ်တော်မရှိတဲ့ အာဏာသိမ်းကာလ မှာစစ်အုပ်စုဟာ ဘတ်ဂျက်ကို စိတ်ကြိုက်ရေးဆွဲခွင့်ရနေတာပါ။