NUG ပြည်ထဲရေးနှင့် တိုင်းငါးတိုင်းမှ ပအဖ တာဝန်ရှိသူများ တွေ့ဆုံ

အတုအယောင်ရွေးကောက်ပွဲ ငြင်းဆန်ပြီး မြေပြင်၌ပြင်းထန်စွာဖိအားပေးရန် ပြည်ထဲရေးဝန်ကြီးပြော

အမျိုးသားညီညွတ်ရေးအစိုးရ၊ ပြည်ထဲရေးနှင့်လူဝင်မှုကြီးကြပ်ရေးဝန်ကြီးဌာနနှင့် စစ်ကိုင်းတိုင်း၊ မကွေးတိုင်း၊ ပဲခူးတိုင်း၊ တနင်္သာရီတိုင်း ဧရာဝတီတိုင်းတို့ရှိ မြို့နယ်ပြည်သူ့အုပ်ချုပ်ရေးအဖွဲ့များ တွေ့ဆုံဆွေးနွေးခဲ့ကြောင်း ပြည်ထဲရေးနှင့် လူဝင်မှုကြီးကြပ်ရေးဝန်ကြီးဌာနက သတင်းထုတ်ပြန်သည်။

ယနေ့ ဇန်နဝါရီ ၁၆ရက်၌ ပြုလုပ်ခဲ့သည့် အဆိုပါတွေ့ဆုံမှုတွင် ပြည်ထဲရေးဝန်ကြီးပြည်ထောင်စုဝန်ကြီး ဦးလွင်ကိုလတ်က အကြမ်းဖက်စစ်ကောင်စီ၏ တရားမဝင် အတုအယောင် ရွေးကောက်ပွဲနှင့်ပတ်သက်၍ ငြင်းဆန်၍ လက်မခံရန် ပြောကြားခဲ့သည်ဟု ဖော်ပြထားသည်။

ထို့ပြင် မြေပြင်တွင် ပြင်းပြင်းထန်ထန် ဖိအားပေးဆောင်ရွက်ရန်မှာကြားခဲ့ပြီး ပြီးခဲ့သည့် ရက်ပိုင်းက မြောင်မြို့နယ်အတွင်း၌ မဲစာရင်းကောက်နေသည့် စစ်ကောင်စီ ထွေအုပ်ဝန်ထမ်း လေးဦးအား ဖမ်းဆီးရရှိခဲ့မှု အခြေအနေကို ပြောကြားခဲ့သည်။

၂၀၂၃သည် အရေးကြီးသည့်နှစ်တစ်နှစ်ဖြစ်၍ အားစိုက်ကာ အဖွဲ့များအားလုံး တိုင်ပင်ဆွေးနွေး ၍ ဆောင်ရွက်ကြရန်လည်း ဝန်ကြီးဦးလွင်ကိုလတ်က ပြောကြားခဲ့ပြီး ဝန်ကြီးဌာနကလည်း ပူးပေါင်းဆောင်ရွက်သွားမည်ဟု အသိပေးခဲ့သည်။

Public Service Announcement

အဆိုပါ အစည်းအဝေးသို့ ပြည်ထောင်စုဝန်ကြီး ဦးလွင်ကိုလတ် ဦးဆောင်ကာ ပြည်သူ့အုပ်ချုပ်ရေးဦးစီးဌာန၊ပြည်သူ့ရဲတပ်ဖွဲ့၊ မီးသတ်ဦးစီးဌာန၊ လူဝင်မှုကြီးကြပ်ရေးဦးစီးဌာန၊ အထူးစုံစမ်း‌ ထောက်လှမ်းရေး ဦးစီးဌာနတို့မှ တာဝန်ရှိသူများ၊ စစ်ကိုင်းတိုင်း၊ မကွေးတိုင်း၊ ပဲခူးတိုင်း၊ တနင်္သာရီတိုင်း၊ ဧရာဝတီတိုင်းတို့မှမြို့နယ်ပြည်သူ့အုပ်ချုပ်‌ရေးအဖွဲ့ဝင်များ တက်ရောက်ခဲ့ကြောင်း ထုတ်ပြန်သည်။