မကွေးတိုင်း၊ ပေါက်မြို့နယ်၊ အုန်းတောကျေးရွာရှိ စာသင်ကျောင်းတွင် စစ်ကောင်စီတပ်များ စုဖွဲ့ထိုင်နေချိန် ဒရုန်းဖြင့် ဗုံးချတိုက်ခိုက်ခဲ့ရာ ထိခိုက်မှုရှိကြောင်း Pauk Revolution Front(PRF)၏ ပြန်ကြားရေးတာဝန်ခံက ပြောသည်။
ယမန်နေ့(ဇန်နဝါရီ ၂၀ရက်) နံနက် ၁၁နာရီခွဲခန့်က ပေါက်မြို့နယ်၊ အုန်းတောကျေးရွာစာသင်ကျောင်း၌ အထိုင်ချတပ်စွဲထားသော စစ်ကောင်စီတပ်သားများအား ဒရုန်းဖြင့် ဗုံးသီးချတိုက်ခိုက်ခဲ့ရာ တစ်ဦး နေရာတွင်သေဆုံးခဲ့ကြောင်း Pauk Revolution Front(PRF)၏ ပြန်ကြားရေးတာဝန်ခံက ပြောသည်။
ထို့အပြင် စစ်ကောင်စီတပ်ဖွဲ့ဝင် နှစ်ဦးလည်း ထိခိုက်ဒဏ်ရာရရှိသွားပြီး PRF ရဲဘော်များ အထိအခိုက်မရှိ ဆုတ်ခွာခဲ့သည်ဟု ဆိုသည်။
“အဲဒီနေရာက မြို့နဲ့လည်းနီးတယ်။ တစ်လုံးပဲ ချနိုင်ခဲ့တယ်။ ၅ယောက်လောက် စုဖွဲ့ထိုင်နေတဲ့ အချိန် ဖြုတ်ချခဲ့တာဗျ။ သူတို့အဲဒီမှာ တပ်စွဲတာ
ကြာတော့ကြာပြီဗျ။ဒါပေမဲ့ သူတို့က ပြန်ရုတ် သွားလိုက် ရောက်လာလိုက်နဲ့ပဲ။ အင်အားအတိအကျတော့ မသိရဘူး။ စစ်ကြောင်းကလည်း အမြဲတမ်းနီးပါးထိုးနေတာဆိုတော့”ဟု ပြန်ကြားရေးတာဝန်ခံက ဆိုသည်။
ဖြစ်စဥ်နှင့်ပတ်သက်၍ စစ်ကောင်စီတပ်၏ ထိခိုက်သေဆုံးမှုအား လူထုနွေဦးက သီးခြားအတည်ပြုနိုင်ခြင်း မရှိသေးပေ။
ဇန်နဝါရီ ၁၉ ရက်ကလည်း ပေါက်မြို့နယ်ရှိ ဇီးပြားရဲစခန်းအား ဒေသတွင်းတော်လှန်ရေးအင်အားစုများက သွားရောက်တိုက်ခိုက်ရာ ရဲတစ်ဦးသေဆုံးခဲ့ကြောင်း မြိုင်(ပကဖ)က ထုတ်ပြန်ထားသည်။