စစ်ကောင်စီ လက်အောက်ခံ နယ်ခြားစောင့်တပ်ဖွဲ့ (BGF) ဖွဲ့စည်းထားသည့် ကရင်နီပြည်လူမျိုး ပေါင်းစုံပြည်သူ့လွတ်မြောက်ရေးတပ်ဦး (KNPLF)က စစ်အာဏာရှင်စနစ် တိုက်ဖျက်ရေးတွင် အဆုံးထိ ပါဝင် သွားမည်ဖြစ်ကြောင်း ကရင်နီတပ်မတော်(KA)၊ ကရင်နီအမျိုးသားကာကွယ်ရေးတပ်(KNDF)တို့နှင့်အတူ ပူးတွဲကြေညာချက်ထုတ်ပြန်ခဲ့သည်။
ကလလတ ဟု ခေါ်ဆိုသည့် KNPLFတွင် စစ်ကောင်စီ လက်အောက်ခံနယ်ခြားစောင့်တပ်(BGF)အဖြစ် ဆက်လက်သွားလိုသည့် ခေါင်းဆောင်အချို့ရှိနေသကဲ့သို့ စစ်အာဏာရှင် တော်လှန်ရေး ဆောင်ရွက်နေသည့် ခေါင်းဆောင်အချို့ရှိနေသည်ဟု ကရင်နီ သတင်းရင်းမြစ်က ပြောသည်။
“ကြားတဲ့သတင်းအရတော့ ဗိုလ်မှူးထွန်းကျော်ရဲ့အောက်မှာ ဗိုလ်မှူးထွန်းရွှေဆိုတာ တစ်ယောက်ရှိသေးတယ်။ သူကတော့ တစ်ဖွဲ့လိုဖြစ်သွားတာပေါ့။ သူကတော့ စစ်အာဏာရှင်ဆန့်ကျင်ရေးမှာ ဟိုး ဒီးမော့ဆို ဒေါငံခါးတို့ဘက်မှာ စဖြစ်ကတည်းက ပါနေတာပေါ့။ လူငယ်တွေပေါ့။လူငယ် တွေကလည်း KNDF ထဲမှာ ရောက်နေတယ်။ နဂိုရ်ကသာအဖွဲ့က ကလလတထဲ ရှိတယ်ဆိုပေမယ့် သူတို့ စိတ်ဓာတ်တွေက စစ်အာဏာရှင် တော်လှန်ရေးနဲ့ KNDF ထဲမှာ နဂိုရ်ကတည်းက အများကြီးရှိနေတာ။လူကြီးပိုင်းကသာ အဖွဲ့နာမည်ခံနေပေမယ့် လူငယ်ပိုင်းက PDF တွေထဲမှာ အများကြီး” ဟု ကရင်နီ သတင်းရင်းမြစ်က ပြောသည်။
ယခု ပူးတွဲထုတ်ပြန်ကြေညာချက်မှာ ဒီဇင်ဘာအတွင်းက ဘောလခဲမြို့နယ် ရွာသစ်မြို့နယ်ခွဲ ဟွေအောကျေးရွာအနီး၌ပစ်ခတ်မှု ဖြစ်စဉ်နှင့်ပတ်သက်၍ KNPLF၊ KAနှင့် KNDF အကြား အဖြစ်မှန် ပေါ်ပေါက်ရေး ကော်မတီဖွဲ့ ဆောင်ရွက်ခဲ့ခြင်းအပေါ် လူထုအား အသိပေးရှင်းပြခဲ့ခြင်းဖြစ်သည်။ အဆိုပါ ကြေညာချက်၌ စစ်အာဏာရှင်စနစ်တိုက်ဖျက်ရေး ဆက်လက် ဆောင်ရွက်မည့် အခြေအနေကို ဖော်ပြခဲ့ခြင်းဖြစ်သည်။ ဟွေအောရွာဖြစ်စဉ်တွင် KNDF/KA ၏ တိုက်ခိုက်မှုကြောင့် KNPLF ရဲဘော်များ သေဆုံးထိခိုက်ရှိခဲ့သည်။
Public Service Announcement
ပစ်ခတ်မှုနှင့် ပတ်သက်၍ သက်ဆိုင်ရာအဖွဲ့အစည်းများမှ အမြင့်ဆုံးအာဏာရှိထိပ်တန်းအဆင့် ခေါင်းဆောင်များ၏ ညွန်ကြားချက်အရ သတင်းအချက်အလက် အမှန်အကန်ရရှိရေး၊ စိစစ်မှတ်တမ်း ရယူခြင်းနှင့် အဖြစ်မှန်ပေါ်ပေါက်ရေးတို့အတွက် အဖြစ်မှန် ပေါ်ပေါက်ရေးကော်မတီတစ်ရပ်ကို ဖွဲ့စည်းပြီး လုပ်ငန်းဆောင်ရွက်ခဲ့ရာတွင် တစ်လကျော်အတွင်း အခက်အခဲများကြားမှ ပြီးစီးအောင်မြင်စွာ ဆောင်ရွက်ခဲ့ကြောင်း၊ သက်ဆိုင်ရာ အဖွဲ့အစည်း အသီးသီး၏ ထိပ်သီးခေါင်းဆောင်များထံ အစီရင်ခံ ပေးပို့ခဲ့ပြီးဖြစ်ကြောင်း ထုတ်ပြန်ခဲ့သည်။
ယခုဖြစ်စဉ်ကြောင့် ညီညွတ်ရေးကိုမထိခိုက်စေဘဲ ဆက်လက်ထိန်းသိမ်းထားနိုင်ရေး၊ စစ်အာဏာရှင်တော်လှန်ရေး အရှိန်မြင့်တင်နိုင်ရေးနှင့် ပြည်သူလူထု၏ ထောက်ခံယိုင်းပင်းမှု မကျဆင်းစေရေးတို့အတွက် ဖြစ်စဉ်တွင် ပါဝင် ပတ်သက်သည့် တပ်ဖွဲ့ဝင်များအား သက်ဆိုင်ရာအဖွဲ့အစည်းအသီးသီးမှ ချမှတ်ထားသည့် စစ်စည်းမျဥ်းဥပဒေပြဌာန်းချက်နှင့်အညီ အပြစ်ပေး အရေးယူမှုများကို အချိန်နှင့်တပြေးညီ ဆောင်ရွက်သွားမည် ဟုလည်း အသိပေးခဲ့သည်။
ထို့ကြောင့် ပြည်သူများအနေဖြင့် စိုးရိမ်မှုများမဖြစ်ကြရန်၊ ကောလဟလများကိုမယုံကြရန်၊ သွေးခွဲသပ်လျိုမှုများကို တော်လှန်ရေး အသိဖြင့် အထူးသတိထားကြရန်၊ ပြည်သူတစ်ရပ်လုံးအနေဖြင့် တော်လှန်ရေးကို ဆက်လက်ထောက်ခံအားပေးကူညီကြပါရန် ဖော်ပြထားသည်။
ထို့ပြင် လက်နက်ကိုင်တော်လှန်ရေးအင်အားစုများ အနေဖြင့် ပြည်သူများနှင့်အတူ စစ်အာဏာရှင်စနစ် တိုက်ဖျက်ရေးကို အတူတကွ အဆုံးထိ ဆက်လက်ပါဝင် သွားကြမည်ဖြစ်ကြောင်း အသိပေးထုတ်ပြန်အပ်သည်ဟု KA၊ KNDFနှင့် KNPLF တို့က ပူးတွဲသဘောထား ထုတ်ပြန်ခဲ့သည်။
