စစ်ကြောင်းမှူးတစ်ဦးကျဆုံးပြီး တိုက်မိုင်းများထိ၍ စစ်ကောင်စီတပ်အများအပြားကျဆုံးဟုဆို
စစ်ကြောင်းမှူးတစ်ဦးကျဆုံးပြီး တိုက်မိုင်းများထိ၍ စစ်ကောင်စီတပ်အများအပြားကျဆုံးဟုဆိုမန္တလေးတိုင်း မိုးကုတ်မြို့နယ်တွင် အမျိုးသားညီညွတ်ရေးအစိုးရ(NUG)တပ်ရင်း (၁၂၂၂)၏ ရှေ့တန်းစခန်းနေရာအား စစ်ကောင်စီတပ်က ဂျက်ဖိုက်တာ သုံးစီးအပါအဝင် လေကြောင်းနှင့် မြေပြင်က တပြိုင်နက်တိုက်ခိုက်ရာ စစ်ကြောင်းမှူးတစ် ဦးကျဆုံးခဲ့ပြီး စစ်ကောင်စီဘက်ကလည်း တိုက် မိုင်းထိ၍ အများအပြားသေဆုံးကြောင်း အဆိုပါတပ်ရင်း၏ သတင်းနှင့်ပြန်ကြားရေးတာဝန်ရှိသူက ပြောသည်။
ဇန်နဝါရီ ၂၀ ရက် မွန်းလွဲ ၁၂နာရီခွဲခန့်က မိုးကုတ် မြို့နယ် မိုင်းဟုန်းကျေးရွာအနီးရှိ တပ်ရင်း (၁၂၂၂) ရှိသည့် ရှေ့တန်းစခန်းနေရာအား စစ်ကောင်စီတပ်က လေကြောင်းတိုက်ခိုက်မှု မိနစ် ၃၀ခန့်နှင့် မြေပြင်မှလည်း စစ်ကြောင်းလေးကြောင်း အင်အား ၂၀၀နီးပါးဖြင့် စစ်ကြောင်းထိုး တိုက်ခိုက်မှုများ ပြုလုပ်ခဲ့ကြောင်းတပ်ရင်း (၁၂၂၂)၏ သတင်းနှင့်ပြန်ကြား ရေးတာဝန်ရှိသူက ပြောသည်။
လေကြောင်းတိုက်ခိုက်မှုတွင် ဝေဟင်မှ ဂျက်ဖိုက် တာ သုံးစီးဖြင့် ဗုံးသီး (၃၀)လုံးခန့် ကြဲချကာ စက်လက် များဖြင့်လည်း ၁၀ကြိမ်ထက်မနည်း ပစ်ခတ်ခဲ့ကြောင်း ၎င်းက ပြောသည်။
မြေပြင်စစ်ကြောင်းထိုး၍ တက်လာခဲ့သော စစ်ကောင်စီ တပ်သားများလည်း (၄၀)မမ၊ (၆၀) မမ ၊M9 များ ၊ ငါးကြင်းမှီးများဖြင့်လည်း တရစပ် ပစ်ခတ်တိုက်ခိုက်ခဲ့ကြောင်း ၎င်းက ဆက်ပြောသည်။
Public Service Announcement
အဆိုပါ တိုက်ခိုက်မှုကြောင့် တပ်ရင်း (၁၂၂၂)၏ စစ်ကြောင်းမှူးတစ်ဦး လေယာဥ်ပေါ်မှ ကြဲချသော လက်နက်ကြီး ဗုံးဆံထိမှန်ကာ ကျဆုံးခဲ့ရကြောင်း အထက်ပါ တာဝန်ရှိသူက ပြောသည်။
ရဲဘော်သုံးဦးလည်း အပြင်းအထန်ဒဏ်ရာရှိခဲ့ပြီး အသက်အန္တရာယ်မစိုးရိမ်ရကြောင်း၊ ကျန်ရဲဘော် များမှာ ကာပစ်ပစ်၍ ဆုတ်ခွာနိုင်ခဲ့သောကြောင့် အထိအခိုက်မရှိကြောင်းလည်း အသိပေးသည်။
စစ်ကြောင်းထိုးတိုက်ခဲ့မည်ကို ကြိုတင်သတင်းရရှိခဲ့ခြင်းကြောင့် စခန်းအနီးတွင် တိုက်မိုင်းများကြိုတင် ထောင်ထားခဲ့သည့်အတွက် မြေပြင်မှတက်လာသည့် စစ်ကောင်စီတပ်သား (၃၀)နီးပါး ထိခိုက်သေဆုံးခဲ့ကြောင်းတပ်ရင်း(၁၂၂၂)၏ သတင်းနှင့်ပြန်ကြားရေးတာဝန်ရှိသူက ပြောသည်။
“သတင်းပေးကြောင့်လို့ဘဲထင်ပါတယ်ဗျ။ မြေပြင်တစ်ခုထဲဆိုရင်တော့ ကျွန်တော်တို့အသာစီးရမဲ့ပွဲပါ။ လေကြောင်းနဲ့ပါ တိုက်ခိုက်တဲ့အတွက် အခုလိုကြုံခဲ့ရတာပါ။”ဟု ၎င်းက ပြောသည်။
မြေပြင်စစ်ကြောင်းထိုးရုံသာမက ဝေဟင်မှလည်း တိုက်ခိုက်ခဲ့သောကြောင့် စခန်းအား စွန့်ခွာခဲ့ပြီး စခန်းရှိ မီးစက်၊ဒိုင်နမို၊ ဆိုင်ကယ်(၅)စီး၊ ရိက္ခာပစ္စည်း အမြောက်အများ၊ ရဲဘော်များ၏ ကျောပိုးအိတ်များနှင့် တခြားသော ပစ္စည်းအချို့ ဆုံးရှုံးခဲ့ကြောင်းလည်း ထပ်မံအသိပေးသည်။
“အသက်လုပြီး ကာပစ်ပုံစံမျိုးနဲ့ ပစ်ပြီးပြေးခဲ့ရတဲ့အတွက် လိုအပ်ချက်တွေတော့ ရှိနေသေးတယ်။ ရဲဘော်တွေရဲ့အသုံးအဆောင်ပစ္စည်းတွေ ပါဝါဘဏိတွေ ကျောပိုးအိတ်တွေ စောင်တွေ အိပ်ရာတွေဆိုလည်း ဘာမှမပါခဲ့ဘူး။ ဆောင်းတွင်းလည်းမကုန်သေးတော့ ဒီရက်ပိုင်းမှာ အအေးတွေပိုနေတဲ့အချိန်ဆိုတော့ လက်တလောလိုအပ်မှုတွေ ရှိနေတယ်။”ဟု ၎င်းက ဆက်ပြောသည်။
တိုက်ပွဲဖြစ်ပွားရာနေရာသည် မန္တလေးတိုင်းနှင့် ရှမ်းပြည်နယ် နယ်စပ်တွင်တည်ရှိပြီး မိုင်းဟုန်းကျေးရွာအပြင် အနီးရှိ ပင်တပြေကျေးရွာမှ ဒေသခံပြည်သူများပါ ထွက်ပြေးတိမ်းရှောင်နေရကြောင်း ဒေသတွင်းသတင်းရင်းမြစ်များက ပြောသည်။
