ကရင်အမျိုးသားအစည်းအရုံး ( KNU ) ရဲ့ ဦးဆောင်မှုအောက်မှာရှိတဲ့ အဖွဲ့အစည်းတွေနဲ့အဖွဲ့ဝင် တွေအနေနဲ့ အပြန်အလှန်နားလည်မှုနဲ့ပူးပေါင်းဆောင်ရွက်ကြဖို့ ဥက္ကဋ္ဌ ဖြစ်သူ ဗိုလ်ချုပ်ကြီး စောမူတူးစေးဖိုးက တိုက်တွန်းလိုက်ပါတယ်။
ဒီနေ့မှာ ကျရောက်တဲ့ ၇၆ နှစ်မြောက် KNU နေ့ ကို ပေးပို့တဲ့သဝဏ်လွှာမှာထည့်သွင်းတိုက်တွန်းလိုက်တာပါ။
KNU ဟာ ပြောင်းလဲဖြစ်ပေါ်နေတဲ့ နိုင်ငံရေးအခင်းအကျင်းတွေနဲ့အညီ မူဝါဒတွေ ပြောင်းလဲချမှတ် တိုက်ပွဲဝင်နေတယ်လို့လည်း KNU ဥက္ကဋ္ဌ က အသိပေးပါတယ်။
ဒီလို ကရင်တစ်မျိုးသားလုံးအတွက် သင့်လျော်အကျိုးရှိမယ့် တော်လှန်ရေးလမ်းစဉ်နဲ့ လုပ်ငန်းစဉ်တွေကို ဖြစ်ပေါ်နေတဲ့ နိုင်ငံရေးအခင်းအကျင်းနဲ့ အညီ ပြောင်းလဲနိုင်လို့ ယနေ့ထက်တိုင် KNU ဟာ မားမားမတ်မတ်ရပ်တည်နိုင်တာလို့ ဆိုပါတယ်။
ကရင့်အမျိုးသားတွေရဲ့ အသိအမှတ်ပြု ထောက်ခံမှုတွေ ဆက်ရရှိနေဖို့ ကြိုးစားအားထုတ်ကြရမယ်လို့လည်း KNU ဥက္ကဋ္ဌ က တိုက်တွန်းတာတွေ့ရပါတယ်။
ဒါအပြင် ကရင့်အမျိုးသားတွေရဲ့ နိုင်ငံရေးရည်မှန်းချက်တွေပြီးမြောက်အောင်မြင်တဲ့အထိ ကျရာတာဝန်အသီးသီးမှာ တာဝန်ယူပြီး ကြိုးပမ်းကြဖို့ကိုလည်း သဝဏ်လွှာထဲမှာ ပြောထားပါတယ်။
