မံစီတွင် စစ်ကောင်စီတပ် စစ်ကြောင်းကို KIA ကြားဖြတ်တိုက်ခိုက်

ကချင်လွတ်လပ်ရေးတပ်မတော်(KIA) တပ်မဟာ(၃) တပ်ရင်း (၂၇) နယ်မြေအတွင်း စစ်ကြောင်းထိုး လှုပ်ရှားလာသည့် စစ်ကောင်စီတပ်ကို ကြားဖြတ်တိုက်ခိုက်ခဲ့၍ တိုက်ပွဲဖြစ်ပွားခဲ့ကြောင်း KIA သတင်းပြန်ကြားရေးက ထုတ်ပြန်သည်။

မံစီမြို့နယ် ဇွပ်ဂျာကျေးရွာအနီး စစ်ရေးလှုပ်ရှားသည့် စစ်ကောင်စီတပ်နှင့် KIA တို့ ယနေ့ ဖေဖော်ဝါရီ ၂၂ရက် နံနက် ၉နာရီ ၁၅ မိနစ်အချိန်မှစ၍ တိုက်ပွဲဖြစ်ပွားခဲ့သည်ဟုသိရသည်။

KIA တပ်စခန်း အနီးသို့ စစ်ကောင်စီတပ်က ထိုးစစ်ဆင် စစ်ရေးလှုပ်ရှားလာ၍ KIAက ကြားဖြတ်တိုက်ခိုက်ခဲ့ကြောင်း၊ တိုက်ပွဲတွင် လက်နက်ကြီးများဖြင့် ပစ်ခတ်တိုက်ခိုက်ခဲ့ကြောင်း ဖော်ပြထားပြီး စစ်ကောင်စီတပ်က သေဆုံးထိခိုက်ရှိမရှိကို ဖော်ပြမထားပေ။

အဆိုပါ နယ်မြေသို့ စစ်ကောင်စီတပ်က ဖေဖော်ဝါရီ ၁၇ရက်ကတည်းက စစ်အင်အား တိုးချဲ့ကာအင်အားအလုံးအရင်းဖြင့် စစ်ရေးလှုပ်ရှားလာ၍ KIAက ကြားဖြတ်တိုက်ခိုက်​နေရာစစ်ကောင်စီတပ်ကသေဆုံးထိခိုက်များခဲ့သည်။

Public Service Announcement

ကချင်သတင်းဌာနအချို့က မံစီမြို့နယ် ဇွပ်ဂျာရွာအနီး တိုက်ပွဲ ပြင်းထန်ခဲ့ပြီး စစ်ကောင်စီတပ်ဘက်က ၁၀ဦးထက်မနည်း သေဆုံးခဲ့ကြောင်း ဖော်ပြထားသော်လည်းPeople’s Spring သတင်းဌာနက သီးခြားအတည်မပြုနိုင်သေးပေ။

ဖြစ်စဉ်နှင့်ပတ်သက်ပြီး မေးမြန်းရန် KIAသတင်းပြန်ကြားရေးဌာနသို့ ဆက်သွယ်ရာ အဆက်အသွယ်မရသေးပေ။

စစ်​ကောင်စီ​တပ်၏ တံတားဦးနှင့် ​နေပြည်​​တော် ​လေတပ်များမှာ ယ​နေ့တစ်ရက်တည်း YAK- 130 ဂျက်​လေယာဥ်အစီး​ရေ ၁၂ စီး​ကျော်ပျံသန်းခဲ့သည်။အများစုမှာ ကချင်ပြည်နယ် နှင့်ချင်းပြည်နယ်သို့ဖြစ်​ကြောင်း​လေ​ကြောင်းကင်း​ထောက်များထံမှသိရသည်။ပုံမှန်အားဖြင့်စစ်​ကောင်စီတပ်သည် တိုက်ပွဲဖြစ်၍ အထိနာပါက​လေ​ကြောင်းအကူသုံးသလို ၊စစ်ဆင်​ရေးများရှိပါကလည်း ​တိုက်လယာဥ်များကိုသုံး​ကြောင်းစစ်​ကောင်စီ သတင်း​ပေးများက​ပြောသည်။

အဆိုပါနယ်မြေများ၌ စစ်ကောင်စီတပ်များ ဆက်ရှိနေ၍ စစ်ရေးတင်းမာမှုရှိနေပြီး တိုက်ပွဲ ဆက်လက်ဖြစ်ပွားနိုင်ကြောင်း KIA သတင်းပြန်ကြားရေးဌာနကဖော်ပြသည်။

KIA တပ်မဟာ(၃) တပ်ရင်း(၃)နယ်မြေ ဝိုင်းမော်မြို့နယ်တွင်လည်း ခြေလျင်လှုပ်ရှားလာသည့် စစ်ကောင်စီတပ် အင်အား ၃၀ ကျော်တပ်ဖွဲ့ကို KIAက စောင့်ကြိုတိုက်ခိုက်ခဲ့ရာ တိုက်ပွဲဖြစ်ပွားခဲ့သည်ဟုဆိုသည်။