နိုင်ငံရေးပါတီမှတ်ပုံပြန်တင်ဖို့ အာဏာသိမ်း စစ်ကောင်စီက သတ်မှတ်ပေးထားတဲ့ ရက်မတိုင်ခင် ၁၀ ရက်အလို ဒီနေ့ အထိ မှတ်ပုံတင်ကြတဲ့ ပါတီ ၂၉ ခုရှိနေပါတယ်။
အဲဒီလို မှတ်ပုံတင်ကြတဲ့ ပါတီ ၂၉ ခုထဲမှာ စစ်ကောင်စီကျင်းပမယ့် ရွေးကောက်ပွဲမှာ တစ်နိုင်ငံလုံးအတိုင်းအတာနဲ့ဝင်ပြိုင်မယ်ဆိုတဲ့ ပါတီ ၇ ခု ရှိတယ်လို့ သိရပါတယ်။
ကျန်တဲ့ ပါတီတွေကတော့ တိုင်းနဲ့ ပြည်နယ်အဆင့်မှာပဲ ပြိုင်ကြဖို့ မှတ်ပုံတင်ကြတယ်လို့ စစ်ကောင်စီရဲ့ သတင်းထုတ်ပြန်ချက်မှာဖော်ပြထားပါတယ်။
တစ်နိုင်ငံလုံးအတိုင်းအတာနဲ့ ပြိုင်ဖို့ မှတ်ပုံတင်ထားကြတဲ့ ၇ ပါတီမှာ ကြံခိုင်ရေး ၊ စစ်ကောင်စီဝန်ကြီး ဒေါ်သက်သက်ခိုင်ရဲ့ပြည်သူ့ရှေ့ဆောင်ပါတီ ၊ ပြည်ထောင်စု ဒီမိုကရေစီပါတီ ၊ ပြည်သူ့အကျိုးပြုကျောင်းသားများပါတီ ၊ တစည ၊ ကျားဖြူပါတီ အမည်ပြောင်းထားတဲ့ ရှမ်းနဲ့ တိုင်းရင်းသားများဒီမိုကရက်တစ်ပါတီ၊ မြန်မာနိုင်ငံတောင်သူလယ်သမားများ ဖွံ့ဖြိုးတိုးတက်ရေးပါတီတို့ဖြစ်ပါတယ်။
အဲဒီပါတီအများစုဟာ အာဏာသိမ်းစစ်ကောင်စီကိုထောက်ခံကြသူတွေ ဖွဲ့စည်းထားတဲ့ ပါတီတွေလည်းဖြစ်ကြပါတယ်။
စစ်ကောင်စီဟာ ပြည်တွင်းမှာရှိနေတဲ့ နိုင်ငံရေးပါတီတွေကို ပြန်လည်မှတ်ပုံတင်ဖို့ အကြပ်ကိုင်ထားပြီး လက်ရှိ မတ်လ ၂၈ ရက်နောက်ဆုံးသတ်မှတ်ထားတာပါ။
မှတ်ပုံပြန်မတင်တဲ့ ပါတီတွေ ကို ဖျက်သိမ်းမယ်လို့လည်းဖိအားပေးထားပါတယ်။
