ပြည်သူများအား မတရားဖမ်းဆီးအမိန့်ချနေသည့် အကြမ်းဖက်စစ်ကောင်စီလက်အောက်ခံ အမရပူရမြို့နယ်တရားရုံးကို ဗုံးခွဲတိုက်ခိုက်ခဲ့ရာ တရားရုံးအစောင့်ရဲတစ်ဦးသေဆုံးပြီး တစ်ဦးဒဏ်ရာရရှိခဲ့ကြောင်း အောင်စည်တော်စစ်ဆင်ရေး မန္တလေး(AST-MDY)မှ တာဝန်ရှိသူတစ်ဦးက ပြောသည်။
“ရုံးအတွင်း ကင်းချထားတဲ့ ဘန်ကာထဲ ပစ်သွင်းခဲ့ပါတယ်။ထိရောက်မှုကတော့ ကွက်တိပါပဲ” ဟု ယင်းစစ်ဆင်ရေးနှင့်ပတ်သက်၍ ၎င်းက ပြောသည်။
မတ်လ ၂၂ ရက် နေ့လည် ၁နာရီခန့်တွင် ယင်းစစ်ဆင်ရေးကို လုပ်ဆောင်ခဲ့ခြင်းဖြစ်ပြီး ၎င်းတို့အဖွဲ့သားအားလုံးဘေးကင်းကြောင်း ဆိုသည်။
“စကစနှင့် သက်ဆိုင်သည့်မည်သည့် နေရာမဆို ကျွန်ုပ်တို့အောင်စည်တော်စစ်ဆင်ရေး ရဲဘော်များမှ စစ်ဆင်ရေးပစ်မှတ်ထားကာ တိုက်ခိုက်မှုများကို အရှိန်အဟုန်မြှင့် လုပ်ဆောင်သွားမည်ဖြစ်ကြောင်း သတိပေးကြေညာအပ်သည်။”ဟု AST-MDY က သတင်းထုတ်ပြန်ထားသည်။
အောင်စည်တော်စစ်ဆင်ရေးအနေဖြင့် မတ်လ ၂၀ရက်ကလည်း ချမ်းအေးသာစံမြို့နယ်ရှိ ပို့ဆောင်ရေးစီမံကိန်း ဦးစီးဌာနရုံးကို တိုက်ခိုက်ခဲ့ရာ ဒုဦးစီးမှူးအပါအဝင် သုံးဦးဒဏ်ရာရရှိခဲ့သည်။
