မန္တလေးတိုင်း၊ အမရပူရမြို့နယ်မှာ စစ်ကောင်စီရဲ့ မြို့နယ်အထွေထွေအုပ်ချုပ်ရေးမှူးအိမ်အနီးက ပိုးထည်တိုက် ဖောက်ထွင်းခံရပြီး ကျပ်သိန်းလေးရာဖိုးနီးပါး ဆုံးရှုံးခဲ့ကြောင်း ဒေသခံများက ပြောပါတယ်။
ပြီးခဲ့တဲ့ မတ်လ(၇)ရက်ညက မန္တလေးမြို့ ၊အမရပူရမြို့နယ်၊ ရွှေဂွမ်းရပ်ကွက်မှာရှိတဲ့ ပိုးထည်တိုက်တတိုက် ဖောက်ထွင်းခံရပြီး ကာလပေါက်စျေး ကျပ်သိန်း လေးရာနီးပါးတန်တဲ့ စိန်လက်ကောက်နဲ့ ရွှေထည်ပစ္စည်းမျိုးစုံ၊ ဖုန်း ၄ လုံးတို့ ခိုးယူခံလိုက်ရတယ်လို့ သိရပါတယ်။
အဲဒီပိုးထည်တိုက်ဟာ စစ်ကောင်စီခန့် မြို့နယ်အထွေထွေအုပ်ချုပ်ရေးမှူးရုံး၊ ဝန်ထမ်းအိမ်ရာတို့နဲ့ လမ်းမတခုသာခြားတယ်လို့ဒေသခံအချို့ကပြောပါတယ်။
Public Service Announcement
“နယ်ပိုင်ကြီးအိမ်နဲ့ နီးနီးလေးရယ်။ စိန်တွေကောပါသွားတာ။”လို့ အမရပူရဒေသခံ အမျိုးသမီးတစ်ဦးက ဆိုပါတယ်။စစ်ကောင်စီလက်အောက်ခံရဲတွေကတော့ အမျိုးသား ၃ ဦးကို သူခိုးလို့ စွပ်စွဲပြီး ဖမ်းဆီးထားတယ်လို့ စစ်ကောင်စီလက်အောက်ခံ ဝါဒဖြန့်တယ်လီဂရန်ချန်နယ်တွေမှာ ဖော်ပြထားပါတယ်။
မန္တလေးမြို့မှာ စစ်ကောင်စီအာဏာသိမ်းပြီးနောက်ပိုင်း ဘဏ်တွေနဲ့ ရွှေဆိုင်တွေ ဓါးပြတိုက်ခံရတာတွေ၊ ခိုးယူလုယက်ခံရတာတွေ မကြာခဏ ဖြစ်ပွားနေပါတယ်။
