မြန်မာစစ်တပ်အတွက် စစ်လက်နက်ပစ္စည်းတွေ ဝယ်ယူပေးနေတဲ့ Royal Shune Lei ကုမ္ပဏီကို ဒဏ်ခတ်ပိတ်ဆို့ဖို့ Justice For Myanmar က တောင်းဆိုထုတ်ပြန်ပါတယ်။
အကြမ်းဖက်မြန်မာစစ်ကောင်စီဟာ ၂၀၂၂ အတွင်း မြောက်ကိုရီးယားဆီကနေ စစ်လက်နက်တွေ ဝယ်ယူခဲ့ဖွယ်ရှိတယ်လို့ NK News က ကြည့်ရှုခဲ့တဲ့ ကုလသမဂ္ဂကျွမ်းကျင်ပညာရှင်များအဖွဲ့ရဲ့ အစီရင်ခံစာကို JFM က ကိုးကားပါတယ်။
ကုလသမဂ္ဂက ဒဏ်ခတ်ပိတ်ဆို့အရေးယူထားတဲ့ Korea Mining Development Trading Corporation ကနေ အမျိုးအစားအတည်ပြုနိုင်ခြင်းမရှိတဲ့ စစ်လက်နက်တွေကို စစ်ကောင်စီက ဝယ်ယူခဲ့တယ်လို့သိရပြီး အဲ့ဒီဝယ်ယူမှုတွေမှာ မြန်မာကုမ္ပဏီ Royal Shune Lei Compnay က ကြားခံပွဲစားအဖြစ် ဆောင်ရွက်ပေးခဲ့တာလို့ JFM က ဆိုပါတယ်။
“ဒီတွေ့ရှိချက်ဟာ နိုင်ငံတကာဥပဒေကို စစ်ကောင်စီက အကြိမ်ကြိမ်ချိုးဖောက်နေမှုတွေရဲ့ နောက်ထပ် သက်သေအထောက်အထားဖြစ်ပြီး ဒါတွေကို ရပ်တန့်ဖို့ စစ်ကောင်စီအတွက် ဘဏ္ဍာငွေနဲ့ စစ်လက်နက်ရလမ်းတွေကို ဖြတ်တောက်ခြင်းအပါအဝင် ညီညွတ်တဲ့ နိုင်ငံတကာအရေးယူတုန့်ပြန်ဆောင်ရွက်မှုတစ်ရပ် လုပ်ဆောင်ဖို့ လိုအပ်ပါတယ်” လို့ JFM က တိုက်တွန်းပါတယ်။
Public Service Announcement
ပြီးခဲ့တဲ့နှစ်မှာ Justice For Myanmar ဟာ Royal Sune Lei ကုမ္ပဏီကို မြန်မာစစ်တပ်အတွက် ရုရှားနဲ့ ဆားဘီးယားနိုင်ငံတွေကနေ စစ်လက်နက်ဝယ်ယူမှုတွေမှာ ကြားခံပွဲစားအဖြစ် ဆောင်ရွက်ပေးနေကြောင်း ထုတ်ဖော်ခဲ့ပြီး ပစ်မှတ်ထားဒဏ်ခတ်ပိတ်ဆို့မှုတွေ ချမှတ်ဖို့ တောင်းဆိုခဲ့ပေမယ့် လက်ရှိအချိန်အထိ ဒဏ်ခတ်ပိတ်ဆို့မှုတွေ ချမှတ်ခြင်း မရှိသေးဘူးလို့ သိရပါတယ်။
Royal Shune Lei ကုမ္ပဏီရဲ့ ကွန်ရက်က စင်ကာပူနိုင်ငံမှာလည်း ချဲ့ထွင်ထားပြီး မြန်မာစစ်အုပ်စုထံ စစ်လက်နက်ရောင်းချဖို့အတွက် စင်ကာပူနိုင်ငံရဲ့ အချုပ်အခြာနယ်မြေနဲ့ ငွေကြေးစနစ်တို့ကို အသုံးပြုခြင်းမရှိစေဖို့ အရေးယူဆောင်ရွက်ချက်တွေ လုပ်ဆောင်ဖို့ စင်ကာပူအစိုးရကို JFM က ဆက်လက်တိုက်တွန်းတောင်းဆိုပါတယ်။
