ကရင်နီ – ရှမ်းပြည်နယ်အစပ် ဖယ်ခုံမြို့နယ်တွင် သင်္ကြန်အတက်နေ့က ရေကစားနေသည့် စစ်ကောင်စီတပ်သားများ တိုက်ခိုက်ခံရပြီး အနည်းဆုံးငါးဦးသေဆုံးကြောင်း ကရင်နီအမျိုးသားများကာကွယ်ရေးတပ်(KNDF)ဖယ်ခုံဇုန် တာဝန်ရှိသူက လူထုနွေဦးသို့ ပြောကြားသည်။
ဧပြီ ၁၆ရက် နံနက်ပိုင်းက ဆောင်ကန်းကျေးရွာတွင် အင်အား ၂၀ခန့်ရှိ စစ်ကောင်စီတပ်ကို အလစ်အငိုက် တိုက်ခိုက်နိုင်ခဲ့ခြင်းဟု ဆိုသည်။
“သူတို့ ရေကစားနေတယ်ဆိုတာ သတင်းအတိအကျရတာနဲ့ ပြင်ဆင်ပြီး ကားနဲ့ဝင်ပစ်တာ။အခြေအနေအရ လက်နက်တွေတော့ မရလာခဲ့ဘူး”ဟု အထက်ပါတာဝန်ရှိသူက ရှင်းပြသည်။
ထို့အပြင် လက်ရှိ ရှမ်း-ကရင်နီအစပ်ဒေသများတွင် စစ်ကောင်စီတပ်နှင့် ပြည်သူ့ကာကွယ်ရေး တပ်များအကြား တပ်ဆိုင်ထားလျက်ရှိပြီး နေ့စဥ်ထိတွေ့မှုရှိနေသည်။
Public Service Announcement
ဖေဖော်ဝါရီ ၂၄ ရက်ကစ၍ ပင်လောင်းမြို့နယ် ဆောင်းပြောင်းကျေးရွာမှတဆင့် ဖယ်ခုံမြို့ ဘက်ခြမ်းသို့ စစ်ကြောင်းထိုးလာသည့် စစ်ကောင်စီနှင့် ၎င်း၏ လက်ပါးစေ ပအိုဝ်းပြည်သူ့စစ် PNO ပူးပေါင်းတပ်ကို ကရင်နီတပ်မတော် (KA) ၊ KNDF နှင့် အလယ်ပိုင်းတိုင်းတပ်ဖွဲ့များက ပူးပေါင်းတိုက် ခိုက်နေသည်။
အလားတူ ကရင်နီပြည်နယ်အတွင်းသို့ ပင်လောင်းမြို့နယ်၊ ရှားတောမြို့နယ်၊ ဒီးမော့ဆိုမြို့ နယ် နှင့် ဘောလခဲမြို့နယ်အသီးသီးတို့မှ စစ်ကောင်စီတပ်က စစ်မျက်နှာ (၄)ခုဖွင့်ကာ စုစုပေါင်း စစ် ကြောင်း (၁၂)ကြောင်းဖြင့်ထိုးစစ်ဆင်လျက်ရှိသည်။
