ဧရာဝတီတိုင်း၊ ကျုံပျော်မြို့တွင်PDFများကစစ်ကောင်စီအုပ်ချုပ်ရေးမှူးရုံးဗုံးခွဲတိုက်ခိုက်မှုတွင်ဒဏ်ရာအပြင်းအထန်ရရှိသွားသောကျုံပျော်မြို့နယ်ရဲတပ်ဖွဲ့မှူးရဲမှူး ကျော်မိုး မေ ၉ ရက်တွင်သေဆုံးသွားကြောင်းဒေသခံအချို့နှင့် PDF အချို့ကပြောသည်။
မေလ ၇ ရက်နံနက်ကကျုံပျော်မြို့နယ်၊အောင်ဆန်းရပ်ကွက်အုပ်ချုပ်ရေးမှုးရုံးတွင်ဗုံးပေါက်ကွဲမှုတွင် ဒဏ်ရာအပြင်းအထန်ရရှိသဖြင့် ဆေးကုသမှုခံနေရင်းမေလ ၉ ရက်တွင်သေဆုံးသွားခြင်းဟု ကျုံပျော်မြို့နယ်ပြည်သူ့ကာကွယ်ရေးတပ်ဖွဲ့ဝင်တစ်ဦးကပြောသည်။
“ ကျော်မိုးသေးတာ အတည်ပြုနိုင်ပြီ။ရန်ကုန်မှာ ဆေးကုရင်းသေတာ” ဟု အထက်ပါရဲဘော်ကပြောသည်။
ကျုံပျော်မြို့နယ်၊အောင်ဆန်းရပ်ကွက်အုပ်ချုပ်ရေးမှုးရုံးတွင် မေလ ၇ရက် နံနက် ၈ နာရီခန့်က ပထမတကြိမ်ပေါက်ကွဲမှုဖြစ်သည်ကို ရဲတပ်ဖွဲ့ကလာရောက်စစ်ဆေးနေစဥ် ပြည်သူ့ကာကွယ်ရေးရဲဘော်များက ဗုံးနှစ်လုံးထပ်မံဖောက်ခွဲခဲ့ခြင်းဖြစ်သည်။ ယင်းဖြစ်စဉ်တွင် မြို့နယ်ရဲမှူးကျော်မိုးနှင့် ရဲအုပ်ကိုကိုလင်းတို့ဒဏ်ရာရသွားပြီး ယခုအခါရဲမှူးကျော်မိုး သေဆုံးသွားခြင်းဖြစ်သည်။
Public Service Announcement
ရဲမှူးကျော်မိုးသည် ပဲခူတိုင်း ကြို့ပင်ကောက်မြို့ဇာတိဖြစ်ပြီး လာမည့် မေလ ၁၅ရက်တွင် ရက်လည်ဆွမ်းသွပ်မည်ဟု သတင်းရရှိသည်။
” သူ့မိသားစုကတော့ နာရေးလာဖို့ လိုက်ဖိတ်နေတယ်။ သွားမယ့်သူတော့မရှိပါဘူး” ဟု ကြို့ပင်ကောက်မြို့ခံတစ်ဦးကလည်းပြောသည်။
ဧရာဝတီတိုင်းအတွင်း စစ်ကောင်စီပစ်မှတ်များအား တော်လှန်ရေးအင်အားစုများကတိုက်ခိုက်မှုပိုများလာသည်။ မေလ ၇ရက်က ကျုံပျော်မြို့အောင်ဆန်းရပ်ကွက်အုပ်ချုပ်ရေးမှုးရုံးဗုံးခွဲတိုက်ခိုက်မှု၊မေလ ၆ရက်ညက ဘိုကလေးမြို့နယ်ရဲစခန်းကို PDFများက ဗုံးခွဲတိုက်ခိုက်မှုဖြစ်ခဲ့သည်။ မေလ ၅ရက်ညကလည်း ဟင်္သာတမြို့မှ စစ်ဖက်ရေးရာလုံခြုံရေးတပ်ဖွဲ့ တပ်ကြပ်ကြီး အောင်ထက်ဆိုသူ သေနတ်ဖြင့် ပစ်သတ်ခံခဲ့ရသည်။
