ကရင်နီ(ကယား)ပြည်နယ်၊ ဒီးမော့ဆိုမြို့နယ်၌ နယ်မြေရှင်းလင်းစဉ် သဂြိုလ်ထားသည့် ရုပ်အလောင်းများတွေ့ရှိကြောင်း ကရင်နီအမျိုးသားများကာကွယ်ရေးတပ်(KNDF)မှ တပ်ဖွဲ့ဝင်တစ်ဦးက ပြောသည်။
ယမန်နေ့က ဒီးမော့ဆို အရှေ့ဘက်ခြမ်းရှိ တစ်နေရာကို နယ်မြေရှင်းလင်းစဥ် စစ်ကောင်စီရုပ်အလောင်းသုံးခုထက်မနည်း တွေ့ရှိခြင်းဟု ဆိုသည်။
“အချို့ဆို ပုပ်ပွနေပြီ။ဘယ်လိုမှ ကိုင်လို့မရဘူး။ဖြစ်သလို သဂြိုလ်ခဲ့တာလဲပါတယ်”ဟု အထက်ပါတပ်ဖွဲ့ဝင်က ပြောသည်။
ယခုဖြစ်စဥ်မျိုးကို ဧပြီအတွင်းက ဒီးမော့ဆို၊ဒေါစဲကျေးရွာအနီး KNDF က နယ်မြေရှင်းလင်းစဥ် ဗိုလ်ကြီးအဆင့်ရှိသူအပါအဝင် စစ်ကောင်စီရုပ်အလောင်းအချို့ကို အလွယ်တကူ စွန့်ပစ်ထားခဲ့ခြင်းမျိုးရှိခဲ့သည်။
လက်ရှိ ကရင်နီဒေသတွင်း စစ်ရေးအရအင်အားထပ်မံဖြည့်တင်းပြီး တစ်ကျော့ပြန် စစ်ကြောင်းထိုးရန်ကြိုးပမ်းနေသည့် စစ်ကောင်စီတပ်သည် တောင်မဲသင်းရွာမှတဆင့် ဖယ်ခုံမြို့ဘက်ခြမ်းရှိ တောင်စလုံးနှင့် မြောက်စလုံးရွာတို့ကို နယ်မြေစိုးမိုးနိုင်ရေးကြိုးပမ်းနေသည်။
Public Service Announcement
ထို့ကြောင့် နှစ်ဖက်တိုက်ပွဲများ ပြင်းထန်ခဲ့ကာ ကရင်နီပူးပေါင်းတပ်မှ ထိခိုက်ကျဆုံးမှု ရှိခဲ့သည်။
ဒီးမော့ဆိုအရှေ့ခြမ်း ဒေသများတွင်မူ ထိတွေ့မှုမရှိသေးသော်လည်း အချိန်မရွေးတိုက်ပွဲ ဖြစ်နိုင်သည်ဟု KNDF က သုံးသပ်သည်။
တစ်ရက်လျှင် သုံးကြိမ်နှုန်းထက်မနည်းသည့် လေကြောင်းတိုက်ခိုက်မှု အပါအဝင် ရာနှင့်ချီ သော လက်နက်ကြီးကျည်များကို ခုခံနေရသည့် ကရင်နီ(ကယား) ပြည်နယ်၏ စစ်ဆင်ရေးမှာ ပို၍ ပြင်းထန်လာဖွယ်ရှိကြောင်းလည်း ဒေသခံ စစ်ရေးသတင်းရင်းမြစ် များက ဆိုသည်။
နှစ်လကျော်ကြာ စစ်ကောင်စီ၏ ကရင်နီပြည်နယ်ထိုးစစ်တွင် မြေပြင်တိုက်ပွဲများ၌အကြိမ်ကြိမ်အဖန်ဖန် ရှုံးနိမ့်ခဲ့သည်။
နယ်မြေခံ တပ်မ (၅၅)အပါ တပ်မ (၆၆) ၊ တပ်မ (၂၂) ၊တပ်မ (၉၉)အစရှိသည့် တပ်မလေးခု အပြင် အမှတ် (၂ ) စစ်ဆင်ရေးကွပ်ကဲမှုဌာနချုပ် (စကခ ၂) လက်အောက်ခံတပ်ရင်းများပါ အသုံးပြု၍ ကရင်နီပြည်နယ်သို့ ဖေဖော်ဝါရီအကုန် မတ်လဆန်းကစ၍ စစ်ကောင်စီက ထိုးစစ်ဆင်ခဲ့ခြင်းဖြစ်သည်။
တိုက်ပွဲများအတွင်း မတ်လဆန်းပိုင်းကစ၍ ဧပြီကုန်အထိ စစ်ကောင်စီတပ်သား ၃၅၀ ကျော်သေဆုံးကာ လက်နက်ကြီး၊ လက်နက်ငယ် ၁၀၀ ကျော်ကို ကရင်နီတပ်ပေါင်းစုက သိမ်းဆည်းနိုင်ခဲ့သည်။
ထို့နောက် စစ်ကောင်စီက ၎င်းတို့ထိုးစစ်ဆင်ခဲ့သည့် နယ်မြေအသီးသီးမှ ဧပြီလကုန်ပိုင်းတွင် ပြန်လည်ဆုတ်ခွာခဲ့သည်။သို့သော် ယခုလ အစ တွင် စစ်ကောင်စီတပ်က အင်အားဖြည့်တင်းပြီးနောက် ယခင် ထိုးစစ်ဆင်ခဲ့သည့် နေရာများသို့ ပြန်လည်ဝင်ရောက် လာခဲ့သည်။
