ဖမ်းဆီးရမိသည့် စစ်ကောင်စီတပ်သားတစ်ဦးကို ကျဉ်စက်ဖြင့်တို့ခဲ့သည့် ရဲဘော်အပါအဝင် နောက်ပြောင်ကျီစယ်နေကြသူများကိုအရေးယူဆောင်ရွက်ပြီးဖြစ်ကြောင်း ကရင်နီအမျိုးသားများကာကွယ်ရေးတပ် KNDF ကယနေ့(မေ၁၅) ထုတ်ပြန်သည်။
KNDFမှ ရဲဘော်များကစစ်သုံ့ပန်း တစ်ဦးကို ကျဉ်စက်ဖြင့်တို့ကာ ၎င်း၏ အနီးတွင် ဝိုင်း၍ နောက်ပြောင်ကျီစယ်နေသည့် ဗီဒီယိုဖိုင်မှာ ဧပြီလ (၂၇)ရက် ကဆိုရှယ်မီဒီယာပေါ်၌ ပျံ့နှံ့ခဲ့သည်။အဆိုပါ ဖြစ်ရပ်ကို ကျူးလွန်သူများမှာလည်း နှိပ်စက်ညှဉ်းပန်းလိုသည့်ရည်ရွယ်ချက်နှင့် ပြုလုပ်ခဲ့ခြင်းမဟုတ်ဟု KNDF က အသ်ိပေးသည်။
“ကျွန်တော်တို့ တပ်ရဲ့ မူဝါဒ နဲ့ အညီ အရေးယူခဲ့တယ် ဆိုတာ ကနဦးပြောလိုတယ်။နောက်တစ်ချက်က ကျွန် တော်တို့ မူဝါဒနဲ့ ခံယူချက်က ခိုင်မာတယ်ဆိုတာပဲ”ဟု KNDF တာဝန်ရှိသူက လူထုနွေဦးသို့ ပြောသည်။
ကရင်နီအမျိုးသားများကာကွယ်ရေးတပ် (KNDF) သည် ပြည်သူလူထုမှ ပေါက်ဖွားလာပြီး ပြည်သူကို ညှဉ်းဆဲသတ်ဖြတ်နေသည့် အကြမ်းဖက်စစ်ကောင်စီနှင့် ရင်ဆိုင်တိုက်ခိုက်နေသော၊ ပြည်သူလူထုကို အကြမ်းဖက်စစ်ကောင်စီ ၏ ရန်မှ ကာကွယ်နေသော အဖွဲ့အစည်းဖြစ်ပြီး KNDFသည် စနစ်ကျနသည့် မူဝါဒများ၊ နိုင်ငံတကာစည်းမျဉ်းစည်းကမ်းများနှင့်အညီ လုပ်ဆောင်နေသည့်အဖွဲ့အစည်းဖြစ်ရာ KNDFမှ ဖမ်းဆီးရမိသည့် စစ်သုံ့ပန်းများကိုလည်း ဂျီနီဗာကွန်ဗန်းရှင်း/KNDF၏စစ်သုံ့ပန်းဆိုင်ရာမူဝါဒ နှင့်အညီ အရေးယူဆောင်ရွက်လျက်ရှိကြောင်းထုတ်ပြန်ချက်တွင်ဖော်ပြထားသည်။
Public Service Announcement
လူ့အခွင့်အရေးနှင့် ဆန့်ကျင်ပြီး ပြည်သူလူထုနှင့် စစ်သုံ့ပန်းများအား နှိပ်စက်ညှဉ်းပန်းခြင်းကို တားမြစ်ပြီး ပြုလုပ်သူကိုလည်း သက်ဆိုင်ရာစည်းမျဉ်းစည်းကမ်း ဥပဒေများနှင့်အညီ အရေးယူ ဆောင်ရွက် နေကြောင်းလည်း KNDF က အသိပေးသည်။
ဤသို့ ဆိုရှယ်မီဒီယာတွင် ပျံ့နှံ့လာသော ရုပ်သံဗီဒီယိုကြောင့် အမှန်တရားနှင့်ငြိမ်းချမ်းရေးကိုလိုလားသော ပြည်တွင်းပြည်ပမှ ပြည်သူများ၊ အဖွဲ့အစည်းများနှင့် နိုင်ငံများအား ဝမ်းနည်းစိတ်အနှောင့်အယှက်ဖြစ်စေသည့်
အတွက် ထပ်တူတပ်မျှ စိတ်မကောင်းဖြစ်ရပြီးKNDF ကအနူးအညွတ်ဝန်ချတောင်းပန်သည်။
အလားတူ KNDFအနေဖြင့် အမှန်တရားနှင့် ပြည်သူလူထုအတွက် ဆက်လက်တိုက်ပွဲဝင် သွားမည်ဖြစ်ကြောင်းကိုလည်း ကတိပြုသည်။
ထို့အပြင် ညှင်းပန်းနှိပ်စက်ခြင်း၊ တရားမျှတမှုမရှိခြင်း နှင့် လူ့အခွင့်အရေးချိုးဖောက်မှု ပုံစံမှန်သမျှကို KNDF က ကန့်ကွက်ရှုတ်ချသည်။
