စစ်ကိုင်းတိုင်း၊ ကလေးမြို့နယ် တောင်ပိုင်း၌ ယနေ့ ဖြစ်ပွားသည့်တိုက်ပွဲအတွင်း စစ်ကောင်စီတပ်မှ ၁၅ ဦးသေဆုံးခဲ့ကြောင်း ချင်းအမျိုးသားများကာကွယ်ရေးတပ်(CNDF)တပ်မှ တာဝန်ရှိသူက ပြောသည်။
မေလ ၂၇ရက် နံနက် ၅နာရီမှစ၍ ကလေးမြို့နယ် ဇင်းကလင်းရွာနှင့် ပေါက်ခုံကျေးရွာကြားတွင် ၁နာရီခွဲကြာ တိုက်ပွဲဖြစ်ခဲ့သည်ဟု CNDF/Vakok တပ်ရင်း၏ ထုတ်ပြန်ချက်၌ ဖော်ပြသည်။
“စစ်ကောင်စီတပ်တွေက ကလေးကနေ ကလေးတောင်ပိုင်းကို စစ်ကြောင်းထိုးဖို့လား မသိဘူး။GTC-ထိုမာမှာ အထိုင်စခန်းတစ်ခုရှိတယ်။ အဲ့နေရာသွားဖို့လား မသိဘူး။ တောင်ပိုင်းကို စစ်ကြောင်းထိုးလာတာ ကားနှစ်စီးနဲ့ ။ ကျနော်တို့ တပ်ရင်းတွေကြိုတင်သတင်းကြားတော့ ညအိပ်ပြီး သွားစောင့်တယ်။ သူတို့ တိုးလာတော့ ကလေးတောင်းပိုင်း ချင်းဆိုင်နဲ့ ဇင်းကလင်းကြားမှာ ရထားလမ်းပေါ်အကာအကွယ်ယူပြီး လက်ဦးယူပြီး တိုက်တာ ”ဟု CNDFတာဝန်ရှိသူက ပြောသည်။
ကလေးမြို့မှ ဇင်းကလင်းဘက်သို့ စစ်ကြောင်းထိုးလာသော စစ်ကောင်နှင့် CNDF/Vakok၊ ပြည်သူ့ကာကွယ်ရေးတပ်ဖွဲ့(ပကဖ) ပူးပေါင်း အဖွဲ့တို့အကြား တိုက်ပွဲဖြစ်ပွားခဲ့ရာ စစ်ကောင်စီမှ ပွဲချင်းပြီး ၁၅ဦး သေဆုံးပြီး အထိအခိုက်များကြောင်း CNDF/Vakok က ထုတ်ပြန်သည်။
Public Service Announcement
ထို့အပြင် တိုက်ပွဲအတွင်း ပူးပေါင်းတပ်မှ ပြည်သူ့ရဲဘော်များ အထိအခိုက်မရှိ ဆုတ်ခွာနိုင်ခဲ့ကြောင်း ဖော်ပြထားသည်။
အဆိုပါတိုက်ပွဲ၌ စစ်ကောင်စီတပ်မှ သေဆုံးထိခိုက်အခြေအနေကို လူထုနွေဦးက သီးခြား အတည်ပြုနိုင်ခြင်းမရှိပေ။
CNDF တပ်မဟာ(၁)ကလည်း ကလေးမြို့တောင်ပိုင်း၌ စစ်ကောင်စီတပ်ကို မိုင်းဆွဲတိုက်ခိုက်ခဲ့သည်ဟု ထုတ်ပြန်သည်။
ကလေးမြို့တောင်ပိုင်းသို့ ယနေ့(မေလ ၂၇ရက်)နံနက် ၅နာရီ ၄၀ မိနစ်တွင် စစ်ကောင်စီတပ်မှ အင်အား၂၀၀ကျော်ဖြင့် စစ်ကြောင်းထွက်လာခဲ့ရာ ကလေး(ပကဖ)နှင့် မြို့ပြစီမံချက်ပြောက်ကျား(UG) အဖွဲ့တို့မှ တိုက်ခိုက်ခဲ့ခြင်းဖြစ်သည်ဟု ဆိုသည်။
အသင့်ပြင်ထားသောမိုင်းကွင်းအတွင်းသို့ နံနက် ၈နာရီ ၁၉မိနစ်တွင် စစ်ကောင်စီတပ်ဖွဲ့များဝင်ရောက်လာအချိန် မိုင်ဆွဲခဲ့ရာ စစ်ကောင်စီတပ်သား ၂၈ ဦးသေဆုံးပြီး ဒဏ်ရာအများအပြားရရှိကြောင်း ကနဦး သတင်းရရှိသည်ဟု CNDF တပ်မဟာ(၁)က ဖော်ပြထားသော်လည်း သီးခြားအတည်ပြုနိုင်ခြင်းမရှိပေ။
