စစ်ကောင်စီတပ်က ပြည်သူတစ်ဦးကိုပါပစ်သတ်သွား
စစ်ကိုင်းတိုင်း၊ မုံရွာမြို့နယ်အခြေစိုက် Area 71 PDFအဖွဲ့၏ စခန်းတစ်ခု စီးနင်းဖျက်ဆီးခံရပြီး ဒေသခံပြည်သူတစ်ဦးအား ပစ်သတ်သွားကြောင်း အဆိုပါအဖွဲ့၏ ပြန်ကြားရေးတာဝန်ခံက ပြောသည်။
ယမန်နေ့ (မေလ ၃၁ရက်) နံနက် ၈ နာရီခန့်က ချောင်းဦးမြို့မှ လာသော စစ်ကောင်စီတပ်သည် Jummer ကား နှစ်စီးဖြင့်ထွက်လာခဲ့သည်။
အဆိုပါ စစ်ကောင်စီတပ်သည် မုံရွေးရွာနှင့် ကြေးမုံကျေးရွာဝန်းကျင်ကို အင်အား ၁၀၀ ဖြင့် စစ်ကြောင်းထိုးပြီး စခန်းအား ဝင်ရောက်စီးနင်းခဲ့ကြောင်း Area 71PDFအဖွဲ့၏ ပြန်ကြားရေးတာဝန်ခံက ပြောသည်။
စစ်ကောင်စီတပ်က စခန်းရှိ လက်နက်ခဲယမ်းများအပါအဝင် စခန်းတွင်းပစ္စည်းများအား မီးရှို့ဖျက်ဆီးခဲ့ရာ ကျပ်သိန်း၃၀၀ခန့် ပျက်စီးဆုံးရှုံးခဲ့သည်ဟု အထက်ပါတာဝန်ခံက ဆိုသည်။
Public Service Announcement
ထို့အပြင် လူသားဒိုင်းအဖြစ် လမ်းပြခေါ်ဆောင် လာသူ ဒေသခံပြည်သူတစ်ဦးအား သေနတ်ဖြင့် ပစ်သတ်ပြီး စခန်းနှင့်အတူ မီးရှို့ခဲ့ကြောင်း Area 71PDFအဖွဲ့ ပြန်ကြားရေးတာဝန်ခံက ပြောသည်။
“ပစ်သတ်ခံရသူက အမျိုးသားပဲဗျ။အသက်အရွယ်ကတော့ ခန့်မှန်းလို့မရဘူး။ ရုပ်ကို မပီတော့ဘူး။”ဟု အထက်ပါတာဝန်ခံက ပြောသည်။
သို့သော် ရဲဘော်များအထိအခိုက်မရှိခဲ့သော်လည်း စခန်းပြန်လည်တည်ဆောက်နိုင်ရန် အကူအညီများလိုအပ်နေကြောင်း Area 71PDFအဖွဲ့က ပြောသည်။
မေလ ၂၈ ရက်ကလည်း မုံရွာခရိုင်၊ အရာတော် မြို့နယ်ရှိ Danger Force LPDF၏ တပ်စခန်းတစ်ခု ဝင်ရောက်စီးနင်းခံရပြီး ကျပ်သိန်း၃၀၀ခန့်ဆုံးရှုံးကာ အသက်(၅၀)အရွယ် အမျိုးသမီးတော်လှန်ရေးရဲဘော်တစ်ဦး ကျဆုံးခဲ့ကြောင်း သတင်းရရှိသည်။
