စစ်ကောင်စီတပ်က မိုင်းထောင်ထား၍ ဒီးမော့ဆိုအရှေ့ခြမ်းရှိ ဒေါတမကြီးနှင့် ဒေါညေးခူကျေးရွာများသို့ ဝင်ရောက်ခြင်း ၊ နေအိမ်ပြန်ခြင်းများ လုံးဝမပြုလုပ်ကြရန် ကရင်နီအမျိုးသားများကာကွယ်ရေးတပ်(KNDF)တပ်ရင်း – ၁၀က ယနေ့ ထုတ်ပြန်သည်။
ယခုနှစ် မတ်လဆန်းပိုင်းကစ၍ ဗျူဟာ နှစ်ခု တပ်ရင်း(၆)ခုဖြင့် စစ်ကောင်စီတပ်က ဒီးမော့ဆို အရှေ့ခြမ်းကို ထိုးစစ်ဆင်ခဲ့ပြီး ဧပြီ ၂၂ရက်တွင် ဒေါညေးခူကျေးရွာမှ အနောက်ဖက်တောင်ကြောသို့ ဆုတ်ခွာသွားခဲ့ကာ မေလ ၂ ရက်ကစ၍ ဒေါညေးခူကျေးရွာအတွင်းသို့ အင်အားဖြည့်တင်းပြီးနောက် ပြန်လည်စစ်ကြောင်းထိုးဝင်ရောက်ကာ ကျေးရွာအတွင်း နေရာအနှံ့တပ်စွဲထားခဲ့သည်ဟု ဆိုသည်။
ဒေါညေးခူကျေးရွာအတွင်းတပ်စွဲထားစဥ်အနီးနားရှိ ဒေါဆိုဖျ ၊ဒေါတမကြီးကျေးရွာများအနီး ထိတွေ့တိုက်ပွဲများ ကြိုကြားဖြစ်ပွားခဲ့ပြီး ဇွန် ၁၄ရက်တွင် စစ်ကောင်စီတပ်ဖွဲ့များမှာ ဒေါညေးခူကျေးရွာမှ ဘောလခဲအနီးသို့ ပြန်လည်ဆုပ်ခွာသွားခဲ့ကာ ကျေးရွာအတွင်းနှင့် ရွာအနီးတစ်ဝိုက်တွင်လည်း မိုင်းများထောင်ထားခဲ့ကြောင်း KNDF က အသိပေးသည်။
“ဒီးမော့ဆို အရှေ့ခြမ်းတိုက်ပွဲက ဒီရက်ပိုင်း ငြိမ်နေတယ်။စစ်ရေးအရအကြောင်းအရင်းတော့ အသေး စိတ်ပြောလို့မရသေးဘူး။ဘောလခဲ ဘက်ကို စကစဘက်က ပြန်ဆုတ်နေတယ်”ဟု KNDF တာဝန်ရှိသူက လူထုနွေဦးသို့ ပြောသည်။
Public Service Announcement
စစ်ကောင်စီတပ်ဖွဲ့များမှာ ဒေါညေးခူကျေးရွာအတွင်းမှ တပ်ဆုတ်သွားသော်လည်း အချိန်မရွေး ပြန်လည်ဝင်ရောက်လာနိုင်ပြီး ကျေးရွာအတွင်းရှိ ၎င်းတို့တပ်စွဲနေထိုင်ခဲ့သော နေရာများအနီးနှင့် ကျေးရွာအနီးတဝိုက်တွင် မိုင်းများ ထောင်ထားခဲ့ကြောင်း ၎င်းက ဆိုသည်။
“ဒေါတမကြီးက ကျေးရွာအုပ်စုကြီးတယ်။လူနေအိမ်က ထောင်ဂဏန်းနီးပါးရှိတယ်။စစ်ဘေးရှောင်ကလည်းများတာပေါ့ ။အခုက စစ်ရှောင်စခန်းတွေမှာရှိသလို ကိုယ်နဲ့အဆင်ပြေမယ်ထင်တဲ့နေရာမျိုးတွေမှာ စစ်ဘေးရှောင်နေရတုန်းပဲ။အခက်အခဲတွေကတော့ အများကြီးရှိပါတယ်”ဟု ကရင်နီစစ်ဘေးရှောင်ကူညီ စောင့်ရှောက်ပေးသူတစ်ဦးက ပြောသည်။
ဒေါတမကြီးကျေးရွာနှင့် ဒေါညေးခူကျေးရွာများနှင့် အနီးတစ်ဝိုက်သို့ ဒေသခံလူထုများအပြင် ပြည်သူများအနေဖြင့် ဖြတ်သန်းသွားလာခြင်းများ ၊ ကျေးရွာများထဲသို့ ဝင်ရောက်ခြင်းများ မပြုလုပ်ရန် KNDFက မေတ္တာရပ်ခံသည်။
