မကွေးတိုင်း၊ ရေစကြိုမြို့နယ်တွင် စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ ငတရော်ကျေးရွာကို လက်နက်ကြီးဖြင့် အကြောင်းမဲ့ပစ်ခတ်ခဲ့၍ ဒေသခံအမျိုးသမီးတစ်ဦး သေဆုံးခဲ့ကြောင်း ဒေသခံများက ပြောသည်။
ယမန်နေ့ (ဇွန်လ ၂၉ ရက်) ညနေပိုင်းက ရေစကြိုမြို့နယ်၊ မင်းကျေးရွာရှိ စစ်ကောင်စီတပ်နှင့်ပျူစောထီးများက ငတရော်ကျေးရွာသို့ (၆၀) မမများဖြင့် ပစ်ခတ်ခြင်း၊ ဒရုန်းဖြင့် အီနာဂါချ တိုက်ခိုက်ခဲ့ရာ ကျေးရွာတွင်းရှိ (၃၆)နှစ်အရွယ် မစန်းဌေးဆိုသူကျည်ထိမှန် သေဆုံးခဲ့ကြောင်း ဒေသခံများက ပြောသည်။
ထို့အပြင် ဒေသခံပြည်သူအများအပြားလည်း ထိခိုက်ဒဏ်ရာရရှိခဲ့သည်ဟု ဒေသခံတို့က ဆိုသည်။
“ရှင်မတောင်ဘက်မှာလည်း ရမ်းသမ်းပစ်နေလို့ ပြည်သူတွေထွက်ပြေးနေရတယ်။”ဟု ရေစကြိုနယ်ခံတစ်ဦးက ပြောသည်။
Public Service Announcement
ယမန်နေ့ည ၁၂ နာရီခန့်ကလည်း စစ်ကောင်စီတပ်သည် နေရင်းကျေးရွာ ဝင်ရောက်ကာ နေအိမ်များကို မီးရှို့ဖျက်ဆီးသွားပြီး ပျက်စီးအိမ်ခြေမသိရသေးကြောင်း ဒေသခံများက ပြောသည်။
ငတရော်ကျေးရွာကို ပြီးခဲ့သည့် ၂၀၂၂ သြဂုတ်အတွင်းကလည်း စစ်ကောင်စီတပ်က မီးရှို့ဖျက်ဆီးခဲ့၍ အိမ်ခြေ ၄၀၀ ကျော် ပျက်စီးဆုံးရှုံးခဲ့သည်။
နွေဦးတော်လှန်ရေးကာလအတွင်း စစ်ကောင်စီတပ်၏ ပစ်ခတ်သတ်ဖြတ်မှုများကြောင့် ကျဆုံးသူ ပြည်သူပေါင်း ၃,၇၀၁ ဦးရှိပြီဖြစ်ကြောင်း နိုင်ငံရေးအကျဥ်းသားများကူညီစောင့်ရှောက်ရေးအဖွဲ့(AAPP)က ဇွန်လ နောက်ဆုံးပတ်တွင် ထုတ်ပြန်ထားသည်။
