စစ်ကောင်စီက ရန်ကုန်မြို့တွင် ယနေ့၌အာဇာနည်နေ့ အခမ်းအနားကို အကြောင်းပြကာ လမ်းပိတ်ဆို့မှုများကို တစ်နေ့လုံးပြုလုပ်ထားသောကြောင့် YBS စီးသည့်ပြည်သူများ အခက်အခဲများကြုံခဲ့ကြရကြောင်းပြည်သူများကပြောသည်။
၇၆ နှစ်မြောက် အာဇာနည်နေ့ အခမ်းအနားပြုလုပ်သည့် အာဇာနည်ဗိမာန် ၊ အလံတင်အခမ်းအနားပြုလုပ်သည့် အတွင်းဝန်ရုံး နှင့် ဗိုလ်ချုပ်အောင်ဆန်း၏ နေအိမ်ပြတိုက် စသည့်နေရာပတ်ဝန်းကျင်များကိုစစ်ကောင်စီက လမ်းပိတ်ဆို့မှုများပြုလုပ်ခဲ့ခြင်းဖြစ်သည်။
အာဇာနည်ဗိမာန်တွင် ပြုလုပ်သည့် အာဇာနည်နေ့ အခမ်းအနားကို နံနက် ၄ နာရီမှ ၈ နာရီခန့်အထိသာပြုလုပ်ခဲ့ခြင်းဖြစ်သော်လည်း ယင်းနေရာအနီးအနားမှ လမ်းပိတ်ဆို့မှုများကို တစ်နေ့လုံးပြန်မဖွင့်ပေးသောကြောင့် ခရီးသွားပြည်သူများ အခက်အခဲကြုံခဲ့ရခြင်းဖြစ်သည်။
“လမ်းလွှဲတွေရှိပေမယ့် YBS စီးတဲ့သူကျတော့ ကိုယ်ဆင်းရမယ့်မှတ်တိုင်မရောက်တာတွေရှိတယ်လေ။ အခမ်းအနားပြီးရင်ဖွင့်ပေးမယ်ကြေညာထားပြီး တစ်ရက်လုံးပိတ်ထားတာတော့မဖြစ်သင့်ဘူး” ဟု ရန်ကုန်မြို့နေ အမျိုးသမီးတစ်ဦးကပြောသည်။
Public Service Announcement
ယခင်နှစ်များက အခမ်းအနားများပြီးဆုံးချိန်တွင် လမ်းပိတ်ထားခြင်းကို ပြန်လည်ဖွင့်လှစ်ပေးသော်လည်း ယခုနှစ်တွင် တစ်ရက်လုံးလမ်းပိတ်ထားခြင်းသည် စစ်ကောင်စီ၏ အကြောက်တရားကြောင့်ဖြစ်နိုင်ကြောင်း ရန်ကုန်မြို့မှအမျိုးသားတစ်ဦးကပြောသည်။
“ရန်ကုန်ကို PDF တွေရောက်ပြီဆိုတာမျိုးတွေကြားလို့ဖြစ်မှာ။ အရင်ကတော့ စိန်ခေါ်ခဲ့ပြီး အခုတော့ ကြောက်နေကြတာ မြင်မကောင်းဘူး”ဟု ၎င်းကပြောသည်။
ယနေ့ အာဇာနည်ဗိမာန်၌ စစ်ကောင်စီပြုလုပ်သည့် အခမ်းအနားသို့ စစ်ကောင်စီ၏ ဒုတိယ ဝန်ကြီးချုပ် ၊ ပို့ဆောင်ရေးနှင့် ဆက်သွယ်ရေး ဝန်ကြီးဗိုလ်ချုပ်ကြီး တင်အောင်ဆန်း၊ နိုင်ငံတော်စီမံအုပ်ချုပ်မှုကောင်စီ အဖွဲ့ဝင် မန်းငြိမ်းမောင် ၊ ဒေါက်တာမူထန်၊ ပြည်ထောင်စု တရားသူ
ကြီးချုပ် ဦးထွန်းထွန်းဦး၊ သာသနာရေးဝန်ကြီး ဦးကိုကို၊ ကြည်း၊ရေ၊လေ ညှိနှိုင်းကွပ်ကဲရေးမှူး ဗိုလ်ချုပ်ကြီး မောင်မောင်အေး တို့တတ်ရောက်ခဲ့သည်ဟုစစ်ကောင်စီက သတင်းထုတ်ပြန်ထားသည်။
အာဇာနည်နေ့တွင် ရွှေတိဂုံဘုရားသို့သွားရောက်ခဲ့သည့် အသက်၆၀ အရွယ် အမျိုးသမီးတစ်ဦးကလည်း “ရွှေတိဂုံသွားတာ လမ်းတွေပိတ်ထားတော့ ပတ်သွားနေရတယ်။ ဟိုရောက်တော့လည်း လှေခါးကပေးမတတ်ဘူး။ဓာတ်လှေခါးနဲ့ပဲတတ်ရတယ်” ဟု ပြောသည်။
ထို့ပြင် ယခုနောက်ပိုင်း ရန်ကုန်မြို့၌ ကင်းလှည့်ရာတွင် စစ်ကောင်စီတပ်ဖွဲ့ဝင်ယူနီဖောင်းဝတ်သူများထက် ရဲတပ်ဖွဲ့ဝင်ယူနီဖောင်းဝတ်ဆင်ထားသူ များကို ပိုမိုတွေ့ရကြောင်းပြည်သူတစ်ဦးကပြောသည်။
