▪︎အဆိုပါဘဏ်များတွင် ပြည်သူများငွေမအပ်သင့်ကြောင်း PDFတပ်ခွဲမှူးတိုက်တွန်း
ပြည်သူများကို အကြမ်းဖက်သတ်ဖြတ်နေသော စစ်ကောင်စီဘဏ္ဍာငွေဖြည့်တင်းနိုင်ရန်အတွက် စစ်ကောင်စီ၏ ငွေတိုက်စာချုပ်များကို ဝယ်ယူနေသည့် ဘဏ်နှင့်လုပ်ငန်းရှင်များကို အရေးသွားမည်ဟု အမျိုးသားညီညွတ်ရေးအစိုးရ၊ စီမံကိန်း၊ဘဏ္ဍာရေးနှင့်ရင်းနှီးမြှပ်နှံမှုဝန်ကြီး ဦးတင့်ထွန်းနိုင်ကပြောသည်။
လက်ရှိအချိန်အထိ စစ်ကောင်စီအတွက် ဘဏ္ဍာရေးနှင့်ငွေရေးကြေးရေးအပိုင်းတွင် အသက်ဆက်နိုင်နေခြင်းမှာ ငွေတိုက်စာချုပ်များရောင်းချရသည့်ငွေများဖြစ်ပြီး ထိုငွေများဖြင့် ပြည်သူကို ပြန်လည်သတ်ဖြတ်ရန် အဓိက ထောက်တိုင်ဝင်ငွေဖြစ်နေသည်ဟု ၎င်းကဆိုသည်။
“ငွေတိုက်စာချုပ်တွေ၊ ငွေတိုက်လက်မှတ်ရောင်းချနေတာ ဒီဟာတွေအားလုံးက တရားလည်းမဝင်ဘူး။ ပြည်သူတွေကို ပြန်ပြီးတော့ အကြမ်းဖက်လုပ်ရပ်တွေဆောင်ရွက်နေတာဖြစ်တယ်။ ကျူးလွန်နေတာဖြစ်တယ်။ ဒါကြောင့်မို့ ပူးပေါင်းပါဝင်နေတဲ့ ပုဂ္ဂလိကဘဏ်တွေကအစ လုပ်ငန်းရှင်တွေ၊ စီးပွားရေးသမားတွေ အားလုံးက တာဝန်ခံရပါ့လိမ့်မယ်”ဟု ဦးတင့်နိုင်ထွန်းကပြောသည်။
ထိုအပြင် ပြည်သူအနေဖြင့် ဘဏ်များတွင် အပ်နှံထားသည့် ငွေများကို တဖက်လှည့်ဖြင့်စစ်တပ်အတွက် ဘဏ္ဍာရေးအထောက်အပံ့ဖြစ်နေသည်ကိုလည်း ပြည်သူများ သိသင့်သည်ဟု ၎င်းကဆက်ပြောသည်။
Public Service Announcement
ထိုသို့ အသုံးပြုနိုင်ရန် တဖက်လှည့်ဖြင့်ဆောင်ရွက်ပေးနေသည့် ပြည်တွင်း ပုဂ္ဂလိကဘဏ်များနှင့် လုပ်ငန်းရှင်များအနေဖြင့် တာဝန်ခံရမည်ဖြစ်ပြီး အမျိုးသားညီညွတ်ရေးအစိုးရက ဥပဒေနှင့်အညီ ပြတ်ပြတ်သားသားဆောင်ရွက်သွားမည်ဟုလည်း NUGဝန်ကြီးကဆိုထားသည်။
စစ်ကောင်စီကရောင်းချသည့်ငွေတိုက်စာချုပ်များသည် တရားမဝင်ကြောင်းနှင့် ပြည်သူ့ကြွေးမြီမဟုတ်၍ နိုင်ငံတော်က ပြန်လည်ပေးရန် အာမခံလည်းမရှိသည့်ငွေဖြစ်သည်ဟု အမျိုးသားညီညွတ်ရေးအစိုးရက ထုတ်ပြန်ထားသည်။
ငွေတိုက်စာချုပ်ဆိုသည် အစိုးရတရပ်က ဘဏ္ဍာရေးလိုငွေကို ပြည်သူလူထုထံမှ ချေးငွေယူရန် ထုတ်ရောင်းသည့် အစိုးရလက်မှတ်စာချုပ်များဖြစ်သည်။
NUGက ထုတ်ပြန်ထားသော စာရင်းများအရ အာဏာသိမ်းပြီးနှစ်နှစ်ကျော်အတွင်း စစ်ကောင်စီသည် ငွေတိုက်စာချုပ်နှင့်ငွေတိုက်လက်မှတ် ကျပ်ဘီလီယံ ၂၀ကျော်ဖိုးထုတ်ရောင်းပြီးဖြစ်သည်။ ထိုပမာဏသည် စစ်ကောင်စီ၏ ကာကွယ်ရေးအသုံးစရိတ်ထက် ၃ဆ ခွဲကျော်ပိုများနေသည်။
ထိုငွေတိုက်ချုပ်များကို ခရိုနီဦးဇော်ဇော်ပိုင်ဆိုင်သည့် ဧရာဝတီဘဏ်နှင့် ၎င်း၏ ချေးသက်သေခံလက်မှတ်ကုမ္ပဏီ AYA Trust တို့က အများဆုံးဝယ်ယူထားသည်။ ထိုနောက် ခရိုနီ ဦးကိုကိုကြီးပိုင်ဆိုင်ထားသည် မြန်မာ့နိုင်ငံသားများဘဏ် (MCB)၊ ခရိုနီ ဦးသိမ်းဝေပိုင်ဆိုင်သည့် ရိုးမဘဏ်
(YOMA Bank)နှင့် ခရိုနီ ဦးအောက်ကိုဝင်းပိုင်ဆိုင်သည့် ကမ္ဘောဇဘဏ်တို့ စသည်တို့က အများဆုံးဝယ်ယူထားသည်ဟု မြန်မာ့နောင်းသတင်းဌာနက စုံစမ်းဖော်ထုတ်ရေးသားထားသည်။
ထို့အပြင် ကွယ်လွန်ပြီးသောဦးသိန်းထွန်း၏ ထွန်းဖောင်ဒေးရှင်းဘဏ်၊ ဆောက်လုပ်ရေးနှင့် အိမ်ယာဖွံ့ဖြိုးရေးဘဏ်၊ သတ္ထုဖွံ့ဖြိုးရေးဘဏ်၊ ပထမပုဂ္ဂလိကဘဏ်၊ ကျေးလက်ဖွံ့ဖြိုးရေးဘဏ်၊ မြန်မာ့စီးပွားရေးဘဏ်၊ နေပြည်တော်ဖွံ့ဖြိုးရေးဘဏ်၊ MICB ဘဏ်၊ မြန်မာ့ငွချေးသက်သေခံလက်မှတ်များ လဲလှယ်ရောင်းဝယ်ရေး ကုမ္ပဏီလိမိတက် စသောဘဏ်များကလည်း ပြည်သူများ၏ အပ်နှံငွေများကို သုံး၍ စစ်ကောင်စီ၏ ငွေတိုက်စာချုပ်အများအပြားဝယ်ယူထားကြောင်းသိရသည်။
လုပ်ငန်းရှင်ကြီးများသည် ပြည်သူလူထုငွေကြေးကို စစ်ကောင်စီအလိုကျဆောင်ရွက်ပေးနေခြင်းဖြစ်ပြီးစစ်ကောင်စီကျူးလွန်သည့် စစ်ရာဇဝတ်မှုများနှင့်လူ့အခွင့်အရေးချိုးဖောက်မှုများတွင် ၎င်းတို့မှာ တာဝန်ရှိသည်ဟု ဘဏ္ဍာရေးဆိုင်ရာအကြံပေးကုမ္ပဏီတစ်ခု မန်နေးဂျင်းဒါရိုက်တာတစ်ဦးကလည်းပြောသည်။
ပြည်သူ့လူထုကဘဏ်များကို အပ်နှံသည့် ငွေကြေးများကို သွေးစွန်းငွေဖြစ်ရန် လုပ်ငန်းရှင်များကလုပ်နေခြင်းဖြစ်ပြီး ပြည်သူလူထုအနေဖြင့် စစ်ကောင်စီထိန်းချုပ်ထားသည့် ဘဏ်များတွင် ငွေကြေးမအပ်နှံသင့်တော့ကြောင်း ၎င်းကဆက်ပြောသည်။
“တော်လှန်ရေးအင်အားစုတွေအနေဖြင့် သွေးစွန်းငွေဖြတ်တောက်ရေးဆိုပြီး ပြည်ပကငွေကြေးစီးဆင်းမှုတွေအပြင် ပြည်တွင်းက ထောက်တိုင်ဖြစ်နေတဲ့ ဘဏ်အပ်ငွေတွေလည်း ဖြတ်တောက်ဖို့ ပြည်သူလူထုကို အသိပေးသင့်တယ်”ဟု ၎င်းကဆိုသည်။
ပြည်သူလူထု၏ ချွေးနဲစာဘဏ်အပ်ငွေများကို ပြည်သူလူထုကို သတ်ဖြတ်ရန်အသုံးပြုနေခြင်းဖြစ်၍ ပြည်သူလူထုအနေဖြင့် ဘဏ်တွင် ငွေအပ်နှံခြင်းများကို မပြုလုပ်ကြရန်လည်း ပခုက္ကူခရိုင်တပ်ရင်း၊ တပ်ရင်းခွဲမှူးတစ်ဦးကပြောသည်။ ဘဏ်လုပ်ငန်းရှင်များအနေဖြင့် ပြည်သူ့လူထုငွေကြေးများကို စစ်ကောင်စီအတွက် ထောက်တိုင်အဖြစ် ကြားခံဆောင်ရွက်ပေးနေလျှင် တော်လှန်ရေးအတွက် ရန်သူဖြစ်မည်ဟု မြို့ပြပျောက်ကြားရဲဘော်တစ်ဦးကလည်းမှတ်ချက်ပေးသည်။
