မိုးဗြဲ-လွိုင်ကော်လမ်းမကြီးနှင့် ဖယ်ခုံမြို့ဘက်တွင်စစ်ကောင်စီကစစ်ကြောင်းထိုးနေပြီး ထိတွေ့တိုက်ပွဲများရှိနေကြောင်းကရင်နီအမျိုးသားများကာကွယ်ရေးတပ် (KNDF) တာဝန်ရှိသူက လူထုနွေဦးသို့ ပြောသည်။
ဖယ်ခုံမြို့နယ်၊ခေါင်းအိ ကျေးရွာ တစ်ကြောနှင့် မိုးဗြဲ-လွိုင်ကော် လမ်းမကြီးကြားရှိ ကန်းကျိုင်း ကျေးရွာ တို့တွင် ယခုရက်သတ္တပတ်အတွင်း တိုက်ပွဲများ ဖြစ်ပွားနေခြင်းဖြစ်ဟု ဆိုသည်။
“ ဒီအပတ်ထဲမှာ ဖယ်ခုံဘက်ဆို ခေါင်းအိဘက်မှာ စစ်ကောင်စီက စစ်ကြောင်းထိုးနေတာရှိတယ်။အဲဒီစစ် ကြောင်းတွေနဲ့ ကျွန်တော်တို့ တပ်ပေါင်းစုတွေ ထိတွေ့မှုရှိနေတယ်။ဖယ်ခုံ-မိုးဗြဲ-လွိုင်ကော်လမ်းမကြီးတွေဘက်မှာဆိုလည်း စစ်ကောင်စီရဲ့ယာဥ်တန်းတွေ အသွားအလာလုပ်လာတာ ခပ်စိပ်စိပ်ဖြစ်လာတယ်။အဲဒါကို ကျွန်တော်တို့ တပ်ရင်းတွေက ကြားဖြတ်တိုက် ခိုက်တာရှိတယ်” ဟု အထက်ပါတာဝန်ရှိသူက ရှင်းပြသည်။
ကရင်နီပြည်နယ်အတွင်း တိုက်ပွဲအရှိန်ကြောင့်ရှမ်းပြည်နယ်အခြေစိုက် စစ်ကောင်စီတပ်ရင်းများမှာ ခြေလျင်၊ယာဥ်တန်း အပါအဝင် ရဟတ်ယာဥ်များ ဖြင့် နေ့စဥ်နီးပါး အင်အားဖြည့်တင်းနေသည်။
Public Service Announcement
ထို့ကြောင့် မိုးဗြဲ-လွိုင်ကော်၊ဆီဆိုင်-လွိုင်ကော်လမ်းမကြီးများကို ပြည်သူများအနေဖြင့် အသုံးမပြုရန် KNDF က သတိပေးထားသည်။
“ အချိန်မရွေးထိတွေ့မှုရှိနိုင်တာကြောင့် တိုက်ပွဲ ကြားထဲမှာ လူထုပိတ်မိနိုင်တာမို့ သတိပေးထားတာ။ နောက်ပြီး အရေးပေါ်အခြေအနေအရ မသွားမဖြစ် အိမ်စီးကားတွေကို ကားမှန်ချပြီး တော့သွားလာခွင့်တော့ပြုထားပါတယ်” ဟု KNDF တာဝန်ရှိသူက ပြောသည်။
ယမန်နေ့က လွိုင်ကော်-မိုးဗြဲလမ်းပိုင်းရှိ ဆောင်ကန်းတွင် ကရင်နီပူးပေါင်းတပ်ဖွဲ့နှင့် စစ်ကောင်စီတို့ ထိတွေ့မူရှိခဲ့ပြီး ရဲဘော်သုံးဦးဒဏ်ရာရရှိခဲ့သည်။
“ ၂၁ ရက်နေ့ကတည်းက တိုက်ပွဲ ဖြစ်တာ။သုံးရက်ဆက်ရှိပြီ။အခု စကစဘက်က ကန်းကျိုင်းရွာဘုန်းကြီးကျောင်းမှာ တပ်စွဲထားတယ်” ဟု ကရင်နီစစ်ရေး သတင်းရင်းမြစ်က ပြောသည်။
ဇူလိုင်လ ဒုတိယပတ်ကစ၍ စစ်ကောင်စီက လွိုင်ကော်-မိုးဗြဲ နှင့် လွိုင်ကော်ဆီ-ဆိုင်လမ်းပိုင်းတွင် နည်းလမ်းပေါင်းစုံဖြင့်စစ်ရေးလှုပ်ရှားမှုများပြုလုပ်ရန်ကြိုးစားနေသည်။
