❝ လျော့ပေးလိုက်တဲ့အမှုများက ပြစ်ဒဏ်ကနေ လွတ်တော့မယ့်အမှုတွေဖြစ်ကြောင်း တရားရုံးနီးစပ်သူပြော ❞
ဒေါ်အောင်ဆန်းစုကြည်ကိုစွဲဆိုထားသည့် ဒါဇင်နှင့်ချီသောပုဒ်မများအနက် အမှု ၅ မှုအတွက်ချထားသည့် ထောင်ဒဏ်နှစ်အနည်းငယ်ကို ပြစ်ဒဏ်သက်သာခွင့်ပေးလိုက်ကြောင်း စစ်ကောင်စီက ထုတ်ပြန်သည်။
အခုပြစ်ဒဏ်လျှော့ပေးလိုက်သည့် အမှုများသည် ပြစ်ဒဏ်ကနေလွတ်တော့မည့် အမှုများဖြစ်ကြောင်း တရားရုံးနှင့်နီးစပ်သူတစ်ဦးက ပြောသည်။
“သူတို့လွတ်ငြိမ်းပေးတယ်ဆိုတာတွေက ပထမဆုံးစစွဲတဲ့အမှု ၅ မှု၊ ဒေါ်စုက NLD ကားယာဉ်တန်း လက်ပြတဲ့အမှုပါ ကိုဗစ်နဲ့က ၂ မှု၊ စကားပြောစက်တွေ့တယ်ဆိုပြီး စွဲဆိုတဲ့အမှု ၂မှုနဲ့ ၅၀၅ (ခ)နဲ့က ၁ မှုပါတယ်။ အဲဒီအမှုတွေသည် ပြစ်ဒဏ်ကနေ လွတ်တော့မယ့်အမှုတွေဖြစ်ပါတယ်” ဟုဆိုသည်။
စစ်ကောင်စီက ဒေါ်အောင်ဆန်းစုကြည်ကို အမှုပေါင်း ၁၉ မှု စွဲဆိုထားပြီး စုစုပေါင်းထောင်ဒဏ် ၃၃ နှစ်ချမှတ်ထားပြီးဖြစ်သည်။ ယခုအခါ စွဲဆိုထားသည့် အမှုများအနက် ၅ မှုအတွက် ကျခံနေရသည့် ထောင်ဒဏ်များကို သက်သာခွင့်ပြုလိုက်ခြင်းဖြစ်သည်။
Public Service Announcement
ဒေါ်အောင်ဆန်းစုကြည်ကို ဆူပူအောင်လှုံ့ဆောင်မှု ၅၀၅ (ခ) အတွက် ချမှတ်ထားသည့် ပြစ်ဒဏ်နှစ်နှစ်၊ ဆက်သွယ်ရေးပုဒ်မ ၆၇၊ ပို့ကုန်သွင်းကုန်ပုဒ်မ ၈ တို့အတွက်ချမှတ်ထားသည့် ထောင်ဒဏ်နှစ်နှစ်၊ သဘာဝဘေးအန္တရာယ်စီမံခန့်ခွဲမှုဆိုင်ရာ ဥပဒေပုဒ်မ ၂၅ နှင့် နှစ်မှုစွဲဆိုထားသည့်အတွက် ထောင်ဒဏ်လေးနှစ်တို့ကို လျော့ပေ့ါပေးလိုက်ခြင်းဖြစ်သည်။
ယင်းအမှု ၅ မှုအတွက် ထောင်ဒဏ်စုစုပေါင်းက ၈ နှစ်ဖြစ်သော်လည်း သဘာဝဘေးပုဒ်မနှင့် ၅၀၅ (ခ)အတွက်ချမှတ်ထားသော ထောင်ဒဏ်ကို ပြစ်ဒဏ်စီရင်သည့် ၂၀၂၁ ဒီဇင်ဘာ ၆ ရက်မှာပင် နှစ်နှစ်လျှော့ပေါ့ထားသည့်အတွက် လက်ရှိလျှော့ပေါ့ပေးလိုက်သည့် ပြစ်ဒဏ်မှာ ၆ နှစ်သာဖြစ်သည်။
သမ္မတဦးဝင်းမြင့်ကိုလည်း အလားတူ ပြစ်ဒဏ်သက်သာခွင့်ပေးခဲ့ပြီး၊ ဦးဝင်းမြင့်ရင်ဆိုင်နေရသည့် အမှု ၈ မှုအနက် နှစ်မှု၏ ထောင်ဒဏ်များကို သက်သာခွင့်ပေးလိုက်ခြင်းဖြစ်သည်။
သမ္မတကြီးဦးဝင်းမြင့်ကို သဘာဝဘေးအန္တရာယ်စီမံခန့်ခွဲမှုဆိုင်ရာ ဥပဒေပုဒ်မ ၂၅ အတွက် ထောင်ဒဏ်နှစ် နှစ်၊ ပုဒ်မ ၅၀၅(ခ) အတွက် ထောင်ဒဏ် နှစ်နှစ် စုစုပေါင်းလေးနှစ်ချမှတ်ခဲ့ပြီး ပြစ်ဒဏ်ချမှတ်ခဲ့သည့် ဒီဇင်ဘာ ၆ ရက်တွင် စုစုပေါင်းပြစ်ဒဏ်လေးနှစ်အနက် နှစ်နှစ်ကို လျှော့ပေါ့ခဲ့သည်။
ယနေ့ သြဂုတ် ၁ ရက် ပြစ်ဒဏ်လျှော့ပေါ်မှုကြေညာချက်တွင် ယင်းကျန်ရှိနေသည့် နှစ်နှစ်ကို လျှော့ပေ့ါလိုက်ခြင်းဖြစ်သည်။
ထို့ကြောင့် ဒေါ်အောင်ဆန်းစုကြည့်သည် ပြစ်ဒဏ်စုစုပေါင်း ၂၇ နှစ်ကျန်ရှိပြီး၊ သမ္မတကြီးဦးဝင်းမြင့်က ထောင်ဒဏ်စုစုပေါင်း ၁၀ နှစ်ကျန်ရှိနေဦးမည်ဖြစ်သည်။
